काठमाडौँ, मङ्सिर ९ : नेपाल र इजरायलबीचको जनस्तरको सम्बन्धलाई कला–संस्कृतिको माध्यमबाट समेत प्रवद्र्धन गर्ने उद्देश्यले राजधानीमा तीनदिने इजरायली चलचित्र महोत्सव नयाँ ढाँचामा शुरु भएको छ ।
कोभिड महामारी मत्थर नभइसकेकाले आफ्नै सवारीसाधनमा बसेर चलचित्रको आनन्द लिन पारखीहरूलाई यहाँस्थित इजरायली दूतावासले १३ औँ संस्करणको महोत्सव‘ड्राइभ इन फिल्म सोज्’ढाँचामा प्रस्तुत गरेको हो ।
एफएम रेडियो जडित सवारीसाधनमा बसेर सोल्टी होटलको सवारी बिसौनीमा ९०.६ मेघाहर्जमा ‘ट्युन’ गरेपछि विशाल पटाङ्गिनीको ठूलो पर्दामा दृश्य हेर्दै आवाज सुन्दै महोत्सवको मजा लिन सकिनेछ ।
संस्कृति, पर्यटन तथा नागरिक उड्डयनमन्त्री प्रेमबहादुर आलेले महोत्सवको आज साँझ उद्घाटन गर्दै इजरायली चलचित्र निर्माता तथा लगानीकर्तालाई नेपालको मनोहर दृश्य र सौन्दर्यको छायाङ्कन गर्न आह्वान गर्नुभयो ।
विदेशी चलचित्र निर्माताहरूलाई छायाङ्कनका लागि नेपालमा आकर्षित गर्न आफ्नो मन्त्रालयले सूचना तथा सञ्चार प्रविधि र अर्थ मन्त्रालयसँग सिनेमा बनाउनेहरूलाई सहुलियत दिन आग्रह गरेको जानकारी उहाँले दिनुभयो ।
मुलुकको पर्यटन प्रवद्र्धनमा छायाङ्कनबाट सकारात्मक प्रभाव पर्ने वास्तविकतालाई दृष्टिगत गरी त्यस निम्ति अन्तरसरकारी निकायसँग समन्वय गरिएको उहाँले बताउनुभयो ।
नेपालका लागि इजरायली राजदूत हनान गोडेरले इजरायली संस्कृति, कला र परम्पराको प्रवद्र्धनका साथै दुई देशबीचको जनस्तरको सम्बन्धलाई थप सुदृढ एवं सुमधुर तुल्याउन महोत्सव आयोजना गरिएको बताउनुभयो । कलाकार राजेश हमालले चलचित्रहरू सिमानारहित र तिनको सन्देश सार्वभौमिक हुने भएकाले गुणस्तरीय चलचित्रप्रति आफ्नो लगाव र आकर्षण सधै रहेकाले कलाक्षेत्रमा नै आफू रमाइरहेको बताउनुभयो ।
महोत्सवमा यहाँस्थित कूटनीतिक नियोगका प्रमुख तथा पदाधिकारी, पूर्व राजदूत, परराष्ट्र मन्त्रालयका उच्च अधिकारी, वरिष्ठ सञ्चारकर्मीका साथै इजरायलमा उच्च शिक्षा हासिल गरेका नेपालीहरूको संस्था सलोम क्लबका पदाधिकारीहरूको उपस्थिति थियो । शनिबारसम्म जारी रहने महोत्सवमा सवारीसाधन भएका चलचित्र पारखीलाई निःशुल्क सिनेमा हेर्ने व्यवस्था मिलाइएको छ ।
