काठमाडौँ, वैशाख १३ : कोरोना महामारीका कारण ग्यास तथा पेट्रोलियम पदार्थको आपूर्ति व्यवस्थामा असहज नहुने बताइएको छ । नेपाल आयल निगमले आपूर्ति सहज भएकै अवस्थामा भण्डारण क्षमता पूर्ण राख्न डिपोहरूलाई निर्देशन गरेको छ । एलपी ग्यासको भण्डारण बढाउन उद्योगीलाई परिपत्र गरेको छ ।
निगमका प्रवक्ता विनितमणि उपाध्यायले भन्नुुभयो, “भारतमा दिन प्रतिदिन महामारी बढिरहेको छ, जसले गर्दा पेट्रोलियम पदार्थको आपूूर्तिमा सहज नहुन पनि सक्छ तर हामी पूर्व तयारीमा छौँ ।” उहाँले त्यसका लागि पूर्ण क्षमताको भण्डारमा जाने भएकाले बजारमा ग्यास पाइँदैन कि तेल पाइँदैन कि भनेर चिन्ता गर्नु नपर्ने बताउनुभयो । विगतमा छ महिना बन्दाबन्दी हुँदा पनि सहज रूपमा काम गरेको उहाँले उल्लेख गर्नुभयो ।
उपभोक्ता अधिकारवादीले पनि भण्डारण वृद्धिसँगै सचेत गराउने काम भइरहेकाले उपभोक्ताहरू डराउनुपर्ने अवस्था नरहेको बताएका छन् । उपभोक्ता अधिकार अनुसन्धान मञ्चका अध्यक्ष माधव तिमिल्सिनाले भन्नुुभयो, “विगतमा जस्तै समस्या नहोस् भनेर ग्यास उद्योगीले खाली भएका सिलिन्डर भर्न लगाएका छन्, सचेत गराएका छन् । ” उहाँले भोलिको अवस्थालाई कसैले उपेक्षा गर्न नमिल्ने हुँदा बेलैमा सचेत गराउने काम सकारात्मक रहेको बताउनुभयो ।
नेपाल एलपी ग्यास उद्योग सङ्घले कोरोनाको महामारी बढ्न थालेको जनाउँदै घरमा रहेका खाली सिलिन्डर भरेर राख्न दुुई दिनअघि सूूचना जारी गरेको थियो । ग्यासको अभाव नहोस् भनेर पहिल्यै अनुरोध गरिएको सङ्घले जनाएको छ । असहज परिस्थिति आउन सक्ने सम्भावना पनि रहेकाले खाली सिलिन्डर छन् भने भर्न लगाइएको सङ्घका अध्यक्ष गोकुल भण्डारीले बताउनुुभयो ।
उहाँले भन्नुभयो, “गतवर्ष आपूर्ति सहज हुँदा पनि सबैले एकैचाेटी खाली सिलिन्डर ल्याउँदा असहज भयो त्यसो नहोस् भन्नका लागि सचेत गराइएको हो । ” उहाँले भन्नुभयो, “उपभोक्ताले सिलिन्डर भरेर हाम्रो माग बढ्ने होइन, भण्डारमा सुविधा हुने हो, त्यो सबैका लागि हो, यसमा पैसा कमाउन खोजे भन्ने हिसाबले बुझ्नु भएन ।” हाल नेपालभर दैनिक एक लाख सिलिन्डर ग्यासको माग छ । जसअनुसार दैनिक १४ सय मेट्रिक टन ग्यास बिक्री हुन्छ । उद्योगीसँग हाल करिब २० हजार मेट्रिक टन मौज्दात छ । जुन १५ दिनलाई पुुग्ने ग्यास हो ।
