काठमाडौं, माघ १४ : बिराटनगर महानगरपालिकाले चन्द्रपुर नगरपालिकालाई हराएको छ । राष्ट्रिय महिला लिग अन्तगर्त बुधबार सम्पन्न खेलमा बिराटनगरले चन्द्रपुरलाई ५–० को फराकिलो अन्तरले हराएको हो ।
बिराटनगरको जितमा कुशुम खतिवडाले हयाट्रिक गोल गर्नुभयो । अनु राई र सरिता शेर्पाले एक एक गोल गर्नुभयो । खेल सुरु भएको १२ औं मिनेटमै खतिवडाले गोल गरेर बिराटनगरलाई १–० को अग्रता दिलाउनुभयो । ३२ औं मिनेटमा अनु राईले गोल गर्दै बिराटनगरको अग्रतालाई दोब्बर बनाउनुभयो । ६३ औं मिनेटमा सरिता शेर्पाले गोल थप्दै बिराटनगरलाई ३–० को अग्रता दिलाउनुभयो ।
कुशुम खतिवडाले लगातार दुई मिनेटमा दुई गोल थप्दै आफ्नो हयाट्रिक पुरा गर्नुका साथै बिराटनगरको चन्द्रपुरमाथि ५–० को जित सुनिश्चित गर्नुभयो । ५६ औं मिनेटमा चन्द्रपुरकी सबिता राना मगरले गोल गर्ने सुन्दर अबसर गुमाउनुभयो । दुबै टोलिले तीन खेलबाट चार अङ्क बटुलेको छ । गोल अन्तरको आधारमा बिराटनगरले चन्द्रपुरभन्दा एक स्थानमाथि चौथो स्थानमा उक्लेको छ ।
