हेटौँडा, १५ फागुन : मकवानपुरको हेटौँडामा दुई मोटरसाइकल एकापसमा ठक्कर खाँदा एक जनाको मृत्यु भएको छ भने तीन घाइते भएका छन् । हेटौँडा उपमहानगरपालिका–१५ चुरियामाई नजिक मोटरसाइकल दुर्घटना हुँदा वीरगञ्ज महानगरपालिका–२३ बस्ने ३० वर्षीय अफतावआलम अन्सारीको मृत्यु भएको जिल्ला प्रहरी कार्यालय मकवानपुरले जनाएको छ ।
बाराबाट मकवानपुरको हेटौैँडातर्फ आउँदै गरेको ना ४३ प १५१७ नम्बरको मोटरसाइकल र सोही दिशाबाट आएको ना ४६ प २८११ नम्बरको अर्को मोटरसाइकल एकापसमा ठोक्किदा दुर्घटना भएको जिल्ला प्रहरी कार्यालय मकवानपुरका प्रहरी प्रवक्ता प्रहरी नायब उपरीक्षक टीकाबहादुर कार्कीले जानकारी दिनुभयो ।
दुर्घटनामा ना ४३ प १५१७ नम्बरको मोटरसाइकल चालक अन्सारी गम्भीर घाइते भएका थिए । उनको उपचारको क्रममा चुरेहिल अस्पतालमा मृत्यु भएको प्रहरीले जनाएको छ । दुर्घटनामा घाइते हुनेमा मृतक आलमको श्रीमती २८ वर्षीया यमामुन नेसा र ना ४६ प २८११ नम्बरको मोटरसाइकल चालक सलार्ही हरिवनका ४५ वर्षीय अबर मैनाली र सोही मोटरसाइकलमा सवार सलार्ही हरिवनकै रमेश उप्रेती रहेको प्रहरीले जनाएको छ । घाइतको हेटौँडास्थित चुरेहिल अस्पतालमा उपचार भइरहेको जनाइएको छ ।
