काठमाडौं, मंसिर २६ : एशियाली फुटबल संघले फिफा विश्वकप कतार २०२२ को लागि दोस्रो चरणको छनोट खेलको तालिका सार्वजनिक गरेको छ । छनोट खेलहरु आगामी मार्च महिनादेखि सुरु हुने अखिल नेपाल फुटबल संघ (एन्फा)ले जनाएको छ ।
कोरोना महामारीले गत् अक्टोबर र नोभेम्बर हुने तय गरिएको खेल दोस्रो पटक स्थगित भएपछि पुर्नतालिका गरिएको छ । त्यसअघि मार्चमा निर्धारण गरिएको खेल स्थगित हुन पुग्दा अक्टोबरका लागि तय गरिएको थियो ।
एन्फाका अनुसार नेपालले छनोट खेल अन्तगर्त २५ मार्च, २०२१ को दिन दोस्रो चरणको पहिलो खेलमा चाइनिज ताइपेइको सामना गर्नेछ । पाँच दिन पछि ३० मार्चमा नेपाली टोलीले अष्ट्रेलिया विरुद्ध स्पर्धा गर्नेछ ।
जोर्डन विरुद्धको खेल नेपालले ७ जुनमा खेल्नेछ । समूह बी मा रहेको नेपालले चार खेलबाट मात्र तीन अङ्क बटुलेको छ । पछिल्लो पटक नेपालले भुटानमा कुवेत विरुद्ध खेल्दा १–० को हार बेहोरेको थियो । नेपालले तीन वटै खेलको आयोजना गर्नेछ ।
