काठमाडौँ, साउन १ : नेपाली सेनाको जनसम्पर्क तथा सूचना निर्देशनालय प्रमुख एवं सैनिक प्रवक्तामा सहायकरथी सन्तोषबल्लभ पौडेल नियुक्त हुनुभएको छ । उहाँले शुक्रबारबाट प्रवक्ताको जिम्मेवारी सम्हाल्नु हुनेछ ।
वर्तमान प्रवक्ता विज्ञानदेव पाण्डेले नवनियुक्त प्रवक्ता पौडेलबीच बिहीबार आयोजित औपचारिक कार्यक्रममा जिम्मेवारी हस्तान्तरण गर्नुभएको छ । उहाँ यसअघि १५ बाहिनीको बाहिनीपतिका रुपमा कार्यरत हुनुहुन्थ्यो ।
कास्की लेखनाथ निवासी प्रवक्ता पौडेल कविशिरोमणि लेखनाथ पौडेलका सन्तान हुनुहुन्छ । यसअघिका प्रवक्ता पाण्डे उत्तरपश्चिम पृतना मुख्यालय सुर्खेतको निमित्त प्रमुखका रुपमा सरुवा हुनुभएको छ ।
नवनियुक्त प्रवक्ता पौडेलले सैनिक सङ्गठनका कामकारबाही तथा गतिविधिहरू आमसञ्चारका माध्यामबाट छिटो–छरितो, स्पष्ट र पारदर्शी ढङ्गले आम नागरिकमाझ पुर्याउने कार्यमा सधै सक्रिय रहने बताउनुभयो ।
उहाँले आवश्यक सुझाव, सल्लाहसहित सबैसँग सहयोगको अपेक्षा राखेको बताउनुभयो । त्यस्तै, यसअघिका प्रवक्ता पाण्डेले करिब एकवर्षे कार्यकाल सफलतापूर्वक सम्पन्न गर्न विभिन्न निकायबाट प्राप्त सहयोग, सुझाव सल्लाह र प्रतिक्रियाका लागि धन्यवाद दिनुभयो ।
