काठमाडौँ, २७ असार : मनसुन मौसमलाई उत्सव मनाउँदै मोडल निशु श्रीपालीद्वारा अभिनित ‘सिमसिमे पानी’ बोलको म्युजिक भिडियो सार्वजनिक गरिएको छ ।
कोहलपुर घर भएकी श्रीपालीको यो पहिलो म्युजिक भिडियो हो । नृत्य र मोडलिङ क्षेत्रमा करिअर बनाउने उदेश्यका साथ युट्युबमार्फत म्युजिक भिडियो सार्वजनिक गर्नुभएको हो । म्युजिक भिडियोमा श्रीपालीसँगै रमेश नेप्किङको अभिनय छ । साथै गीतमा अर्जुन बराइली र चन्द्र सुनार स्वर रहेको छ ।
निरज रासकोटीले म्युजिक भिडियोको सङ्गीत संयोजन र एरेन्ज गर्नुभएको छ भने रासकोटीले नै निर्देशन र सम्पादन गर्नुभएको हो । धीरज खड्काको कोरियोग्राफी रहेको म्युजिक भिडियोमा दुई प्रेमीको वर्षात्मा हुने रोमाञ्चक भाव कथा शैलीमा प्रस्तुत गरिएको छ ।
तेइस वर्षीया मोडल श्रीपालीले पहिलो म्युजिक भिडियोको प्रभाव बढेपछि तीज गीतमा समेत भिडियो बनाउने अवसर आएको बताउनुभयो । उहाँले तीजकै लक्षित शान्ती श्री परियारको तीज गीतमा म्युजिक भिडियो बनाउन लागेको बताउनुभयो । “तीजका लागि थुपै्र अन्य म्युजिक भिडियोमा अभिनय गर्ने अवसर आएका छन”, उहाँले भन्नुभयो, “यसले मेरो अभिनय रुचि बढाउन हौसला मिलेको छ ।”
