काठमाडौँ, २५ असार : सिराहाको नरहा गाउँपालिकाको कार्यालयका तत्कालीन प्रमुख प्रशासकीय अधिकृत भवेश कुमार झाविरुद्ध सार्वजनिक सम्पत्ति हिनामिना गरी भ्रष्टाचार गरेको मुद्दा दायर भएको छ ।
अख्तियार दुरुपयोग अनुसन्धान आयोगका प्रवक्ता नरहरि घिमिरेका अनुसार आर्थिक वर्ष २०७४/७५ मा कार्यालयले नियोमेड इन्टरनेशनलसँग खरिद गरेको ५७ प्रकारका औषधीजन्य मालसामानहरुको नियम विपरीत भुक्तानी आदेश र जिन्सी दाखिला प्रतिवेदन बिना नै आपूर्तिकर्ताले पेश गरेको बिल बमोजिम छ लाख २० हजार ९६ रुपियाँ बराबरको औषधीजन्य वितरण नगरी÷नगराइ हानिनोक्सानी गराइएको छ ।
तत्कालीन लेखापाल सुरेश कुमार कुसियैतले औषधीजन्य मालसामानहरुको बिल बमोजिमको रकम आपूर्तिकर्तालाई भुक्तानी गरेर सो बराबरको रकम हानिनोक्सानी पुर्याएको आयोगको विज्ञप्तिमा उल्लेख छ ।
यसैगरी, आयोगका अनुसार कास्कीको पोखरा महानगरपालिका वडा नं. २२ पुम्दी भुम्दी तारेभिरस्थित दुर्गा आधारभूत विद्यालयका तत्कालीन शिक्षक बोधराज पौडेलविरुद्ध झुट्टा विवरण पेश गरी शिक्षकको नियुक्ति लिएको आरोप लागेको छ ।
पौडेलले २०४९ मंसिर १९ गते अस्थायी एवम् २०६० चैत २६ मा स्थायी दुवै नियुक्तिको समयमा जन्म मिति २०१३/०१/२७ भएको नागरिकता पेश गरेको तर शैक्षिक प्रमाणपत्रमा उल्लेख भएको उमेरभन्दा सात वर्ष कम अर्थात २०२० वैशाख २७ गते उल्लेख रहेको आयोगले जनाएको छ ।
२०८० वैशाख २६ गतेसम्म प्रावि तृतीय श्रेणीको स्थायी शिक्षकको रुपमा अध्यापन गरी २०७९ चैत मसान्तसम्मको तलबभत्तासहितको ओहोदा, लाभ तथा सरकारी सेवा, सुविधा समेत प्राप्त गरेको र निजको उक्त कार्य भ्रष्टाचार निवारण ऐन, २०१७ को दफा १२ र प्रचलित भ्रष्टाचार निवारण ऐन, २०५९ को दफा १६ को उपदफा १ बमोजिम कसुर भएको आयोगको विज्ञप्तिमा उल्लेख छ ।
यसैगरी, धनुषाको गणेशमा चारथान नगरपालिका वडा नं. १० बरमझियाका राहत शिक्षक ब्रहमदेव यादवविरुद्ध नक्कली अध्यापन अनुमति पत्रसम्बन्धी मुद्दा दायर भएको छ ।
आयोगका अनुसार यादवले २०६३ सालदेखि निमावि राहत शिक्षकको नक्कली स्थायी अध्यापक अनुमति पत्र पेश गरी नियुक्ति लिएका थिए ।
उनीहरुविरुद्ध भ्रष्टाचार निवारण ऐन, २०५९ बमोजिम कैद र जरिवानाको सजाय हुन मागदाबी लिइ मंगलबार विशेष अदालत, काठमाडौैंमा आरोपपत्र दायर भएको आयोगले जनाएको छ ।
