काठमाडौं, असार ४ : युभेन्ट्सलाई हराउँदै नपोलीले कोपा इटालिया फुटबल प्रतियोगिताको उपाधि जितेको छ । बुधबार राति सम्पन्न खेलमा नपोलीले युभेन्टसलाई पेनाल्टी शुटआउटमा ४–२ ले हराएको हो ।
निर्धारित ९० मिनेटको खेल गोलरहित बराबरीमा सम्पन्न भएपछि निर्णयका लागि खेल पेनाल्टी शुटआउटमा गएको थियो । पेनाल्टीमा नपोलीका गोलरक्षक एलेक्स मरेटले पाउलो डिबालाको प्रहार बचाउनुभयो ।
युभेन्टसका लागि डयानीलोले गर्नुभएको दोस्रो प्रहार पनि गोलपोष्ट छिर्न पाएन । लिओनार्डो बोनुची र आरोन राम्सेले गर्नुभएको तेस्रो र चौथो प्रहार गोलमा परिणत भएपनि युभेन्टसलाई खेल आफ्नो पक्षमा पार्न निकै अबेर भइसकेको थियो ।
नपोलीका लागि कप्तान लोरेन्जो इन्सिग्ने, म्याटियो पोलीटानो, म्याक्सीमोभिच र अर्कादिउजले गर्नुभएको प्रहार गोलमा परिणत भयो । नपोलीले छ वर्षपछि उपाधि हात पार्न सफल भयो ।
