काठमाडौँ, जेठ ३० : कुवेतबाट आज पनि १४९ जना नेपाली नागरिक स्वदेश फर्किएका छन् । कुवतको जजिरा एयरलायन्सको जहाजबाट नेपाली नागरिक लिएर साढे मध्यान्न त्रिभुवन विमानस्थलमा उत्रेको हो ।
त्रिभुवन अन्तर्राष्ट्रिय विमानस्थलका प्रवक्ता देवचन्द्रलाल कर्णले १४२ जना महिला सातजना बालबालिका सहित १४९ जना नेपाल आउनु भएको जानकारी दिनुभयो । ति मध्ये केही भर्खर जन्मेका शिशु समेत रहेको जनाइएको छ ।
अवैद्य रुपमा कुवेतमा बसेकालाई त्यहाँको सरकारले आममाफी दिएको थियो । जसमध्ये नेपाली महिलालाई तीनवटा फ्लाइटमार्फत कुवेत सरकारले आफ्नै खर्चमा स्वदेश फिर्ता गराइसकेको छ ।
आम माफी पाएलगत्तै स्वदेश फिर्तिको तयारीमा उहाँहरु झण्डै डेढ महिना अस्थायी सेल्टरमा बस्नुभएको थियो । यसैबीच नेपाली नागरिक फिर्ता गर्न थप दुई उडानको लागि कुवेतबाट पहल भैरहेको जनाइएको छ ।
हिजो दुईवटा जहाजको उडानमार्फत २९९ जना नेपाली महिला नेपाल फर्कनुभएको थियो । कुवेतबाट फर्कन चाहेका ७ हजार ९९१ मध्ये २ हजार ९९१ जनाले फर्कने अनुमति प्राप्त गरेका छन् ।
