सुदूरपश्चिम, ६ असोज : कैलालीको कैलारीमा भएको निसर्ग हस्पिटल फुटबल प्रतियोगितामा पुरुषतर्फको उपाधि सुदूरपश्चिम–११ स्पोर्टस् क्लबले जितेको छ । महिलातर्फको उपाधि सुर्मादेवी युवा क्लब कैलालीले हात पारेको छ ।
‘अटवारी’ पर्व र हरितालिका तीजको उपलक्ष्यमा न्यू युवा सुन्दर शक्ति युवा क्लबद्वारा आयोजित उक्त प्रतियोगिताअन्तर्गत पुरुषतर्फको फाइनलमा सिआउर सेभेन फुटबल क्लबलाई ०–१ गोलले हराउँदै सुदूरपश्चिम–११ ले उपाधि जितेको हो ।
सुदूरपश्चिम–११ का लागि भरत टमाटाले गरेको गोल निर्णायक बन्यो । उपाधिसँगै विजेतालाई रु एक लाखसहित ट्रफी पुरस्कार प्रदान गरिएको छ । उपविजेता सिआउर सेभेनले रु ५० हजारसहित ट्रफी प्राप्त गरेको छ ।
पुरुषतर्फ सिआउर सेभेनका किरण योगी सर्वोकृष्ट खेलाडी घोषित भए । सुदूरपश्चिम–११ का भरत टमाटा सर्वाधिक गोलकर्ता र सोही टिमकै आकाश बुढा उत्कृष्ट गोलरक्षक घोषित भए । महिलातर्फको फाइनल प्रतिस्पर्धामा सुर्मादेवी युवा क्लबले पटेला स्मार्ट क्लबलाई टाइब्रेकरमा किनारा लगाउँदै उपाधि जितेको हो ।
निर्धारित समयमा दुवै टोलीले १–१ को बराबरी खेलेका थिए । सुर्मादेवीका लागि विर्सना चौधरी र पटेलाका लागि ममता पुनमगरले गोल गरेकी थिइन् । टाइब्रेकरमा सुर्मादेवीले पटेलालाई ३–१ गोलले हराउँदै उपाधि जित्यो ।
सुर्मादेवीका लागि शिवागी स्नेही, विपना स्नेही र अस्मिता चौधरीले गोल गरिन् । विर्सना चौधरी र धना बोहोराले गरेको प्रहार गोलमा परिणत हुन सकेन । पटेलाका लागि कमला विष्टको प्रहारमात्रै गोलमा परिणत हुनसक्यो । ममता पुनमगर, नैना बोहोरा र अनिषा कुँवरले गोल गर्न सकिनन् ।
महिलातर्फको विजेता भएसँगै सुर्मादेवीले रु २५ हजारसहित ट्रफी पाउँदा उपविजेता पटेलाले रु १५ हजारसहित ट्रफी पाएको छ । सुर्मादेवीकी विर्सना चौधरी सर्वोकृष्ट खेलाडी, गायत्री मल्ल उत्कृष्ट गोलरक्षक र पटेलाकी ममता पुनमगर सर्वाधिक गोलकर्ता बनिन् । प्रतियोगिताका विजेता तथा उपविजेता खेलाडीलाई आज एक कार्यक्रमबीच पुरस्कार वितरण गरिएको छ ।
