काठमाडौँ, जेठ २ : लकडाउनको मौका छोपी रासायनिक मलको कृत्रिम अभाव गरेर कालोबजारी गरेको आरोपमा पक्राउ परेका एक सहकारी संस्थाका सञ्चालक धरौटीमा छुटेका छन् ।
कमलामाई नगरपालिका–६ स्थित बागवानी कृषि सहकारी संस्था लिमिटेडका सञ्चालक डुकेन्द्र दाहालले जिल्ला प्रशासन कार्यालय सिन्धुलीको आदेशमा एक लाख ७० हजार धरौटीमा छुटेका हुन् ।
रासायनिक मलको मूल्यवृद्धि गरी कालोबजारी गरेको आरोपमा प्रहरीले गत वैशाख २४ गते दाहाललाई पक्राउ गरेको थियो । वैशाख ३१ गते धरौटी रकम जम्मा गरेपछि दाहाललाई छाडेको जिल्ला प्रहरी कार्यालय सिन्धुलीका प्रहरी नायब उपरीक्षक श्यामबहादुर खत्रीले जानकारी दिनुभयो ।
प्रहरीले सहकारीको गोदामसमेत सिल गरेको थियो । नेपाल सरकारबाट सिन्धुलीका कृषकलाई बिक्री गर्न अनुदानमा आएको युरिया मलको मूल्यवृद्धि गरी बेचेको र जिल्लाका किसानलाई बिक्री नगरी रामेछापको एक सहकारीलाई बैच्दै गरेको अवस्थामा प्रहरीले सञ्चालक दाहाललाई पक्राउ गरेको प्रहरी उपरीक्षक खत्रीले भन्नुभयो । उहाँले भन्नुभयो, “सहकारीले युरिया मलको कालोबजारी गर्ने गरेको किसानबाटै गुनासो आएपछि प्रहरीले छापा मारेर मूल्यवृद्धिसहित बेच्दै गरेको युरिया मल र गाडीसमेत नियन्त्रणमा लिएको थियो ।”
अनुदानमा आएको ५० केजीका ८४० बोरा युरिया मल उक्त सहकारीका सञ्चालक दाहालले सिन्धुली जिल्लाका कृषकलाई बिक्रीवितरण नगरी १७० बोरा युरिया मल प्रगतिशील कृषि सहकारी संस्था रामेछापलाई बिक्री वितरण गर्दै गरेको अवस्थामा प्रहरीले गोदाम नै सिल गरेको थियो । सो अवसरमा प्रहरीले रामेछाप पठाउने तयारी गरिरहेको अवस्थामा ना७ख ९२४८ नंको ट्रकबाट ४२० बोरा, ना५ख ५१९ नंको ट्रकबाट २५० बोरा, ना७ख ३६६७ नंको ट्रकबाट दुई बोरा एसएसपी सिङ्गल फोस्टेट नामक डिएपी मल र ना६ख ७४७२ नंको ट्रकबाट ५५ बोरा एसएसपी फोस्टेट नाम डिएपी मलसमेत बरामद गरेको थियो ।
घाँस काट्न जाँदा लडेर मृत्यु
सिन्धुलीको गोलन्जोर गाउँपालिकामा घास काट्न जाँदा लडेर एक महिलाको मृत्यु भएको छ । मृत्युहुनेमा गोलन्जोर गाउँपालिका–२ का अन्दाजी २२ वर्षीया सरिता नेपाली रहेको जिल्ला प्रहरी कार्यालय सिन्धुलीले जनाएको छ । प्रहरीका अनुसार घरबाट घाँस काट्न भनी हिँडेकी सरिता अन्दाजी एक किलोमिटर टाढाको झगरे छाँगाभिर पाखामा घाँस काट्ने क्रममा लडेर मृत्यु भएको हो ।
