काठमाडौँ,माघ २९ : नेपाल रग्बी सङ्घको आयोजनामा तेस्रो संस्करणको फिफ्टिन्स रग्बी लिग त्रिपुरेश्वरस्थित दशरथ रङ्गशालामा आजदेखि सुरु भएको छ ।
राष्ट्रिय खेलकुद परिषद् (राखेप) का सदस्यसचिव टङ्कलाल घिसिङले रेफ्रीलाई रग्बी बल हस्तान्तरण गरी प्रतियोगिताको उद्घाटन गर्नुभयो । आज भएको पहिलो चरणको खेलमा गोर्खाली रग्बी क्लब बिजयी भएको छ ।
श्रीराम श्रेष्ठ कप्तान रहेको गोर्खाली रग्बी क्लबले हिमालयन टाइगर रग्बी क्लबलाई ६७–१७ स्कोरले पराजित गर्दै विजयी भएको हो ।
त्यस्तै आजै भएको दोस्रो खेलमा आकाश भैरव र त्रिभुवन आर्मी क्लबबीच प्रतिस्पर्धा भएको थियो । सञ्जीव कुँवरको कप्तानी रहेको आर्मीले ७२–० स्कोरमा विजयी भयो ।
दोस्रो चरणको खेल फागुन ३ गते हुनेछ । त्यस दिन आर्मी र हिमालय तथा आकाश भैरव र गोर्खालीबीच खेल हुनेछ । अन्तिम दिन फागुन ६ गते हिमालयन र आकाश भैरव तथा आर्मी र गोर्खालीबीच खेल हुनेछ ।
