काठमाडौं, वैशाख १३ : सुरक्षाको माग गर्दै कीर्तिपुर प्रहरी कार्यालय गएका विद्यार्थीलाई अज्ञात समूहले कुटपिट गरेको छ । बीच सडकमा लडाएर विद्यार्थीहरुलाई टाउकोमा कुल्चेको भिडियोमा देखिएको छ ।
निर्घात कुटाइ खाने विद्यार्थी ललितजंग रावत रहेको र उनी त्रिभुवन विश्वविद्यालय क्याम्पस कीर्तिपुरमा अध्ययनरत रहेको बुझिएको छ । उनलाई अहिले स्काउटले उद्धार गरेर अस्पताल पठाएको समाजवादी विद्यार्थी युनियनका अध्यक्ष रुपनारायाण श्रेष्ठले बताए ।
राहत वितरणको विषयमा केही दिनअघि भएको विवादपछि आफ्ना सहकर्मीको सुरक्षा माग गर्दै विद्यार्थीहरु महानगरीय प्रहरी कीर्तिपुर पुगेको अध्यक्ष श्रेष्ठले बताए । प्रहरी परिसरबाट फर्कनै लाग्दा उनीहरुमाथि शनिबार बिहान ९ बजे कुटपिट भएको श्रेष्ठले बताए ।
काठमाडौं प्रहरी परिसर कीर्तिपुर वृत्तका डीएसपी छेदिलाल कामदीले लकडाउन उल्लंघन गर्दै केही युवाहरु सडकमा निस्किएको र आपसमा भिडेको बताए । उनले भने, ‘स्थानीयवासीले झगडा भएको खबर गर्नासाथ हामी त्यहाँ पुगेका थियौं तर हामी जाँदा त्यहा कोही थिएनन् ।’
स्थानीय विद्यार्थीहरुले भने राहत माग्नेहरुलाई उच्छृङ्खल युवाको समूहले कुटपिट गरेको बताएको अनलाइन खबरमा उल्लेख छ ।
