रौतहट, वैशाख ८ : रौतहटमा गएराति एक युवकको हत्या भएको छ । जिल्लाको पच्छिमी भेग स्थित रहेको कटहरिया नगरपालिका १ हनुमान टोलका २५ वर्षका सञ्जीव यादवको निर्घात कुटपिट गरी हत्या गरिएको हो ।
कुटपिटबाट गम्भीर घाइते भएका यादवको उपचारको क्रममा मृत्यु भएको प्रहरीले जनाएको छ । गएराति करिव १० बजेको समयमा आफ्नै घरमा सुतिरहेका सञ्जीवलाई केहि कुराकानी गर्नु छ भनेर छिमेकी राधे दासले बोलाएर आफनो घरतिर लगनुभएको थियो ।
तर घर बाहिर निस्किएको केहिबेरमै यादव गम्भीर घाइते अवस्थामा फेला परेपछि तत्काल एम्बुलेन्समार्फत उपचारको लागि वीरगञ्ज लगिएको थियो । शरीरको टाउको सहितको विभिन्न भागमा गम्भीर चोट लागेका यादवको उपचारकै क्रममा मृत्यु भएको जिल्ला प्रहरी कार्यालय रौतहटले जनाएको छ ।
घटनामा संलग्न भएको आरोपमा राधे दासलाई प्रहरीले नियन्त्रणमा लिएको छ । घटनाको कारणबारे अनुसन्धाान भइरहेको जिल्ला प्रहरी कार्यालय रौतहटका प्रहरी उपरीक्षक रविराज खड्काले बताउनुभएको छ ।
