काठमाडौँ, भदौ १२ : तुलसी महर्जन र रिता प्रजापतिको जोडीले राष्ट्रिय खेलकुद परिषद् (राखेप) को ५९औँ वार्षिकोत्सवका अवसरमा आयोजित डबल्स ब्याडमिन्टन प्रतियोगिताको मिक्स डबल्समा आज स्वर्ण जितेका छन् ।
आयोजक राखेपको त्रिपुरेश्वरस्थित कभर्डहलमा भएको प्रतियोगितामा सुजन खतिवडा र विमला जोशीको जोडी दोस्रो भए । प्रजापति दाहाल र रुका गिरी तथा धर्मराज ओझा र रिता चौलागाईंको जोडी तेस्रो भए ।
पुरुष डबल्समा पनि तुलसीले भीमप्रसाद राईसँग मिलेर स्वर्ण जिते । फणिन्द्र पौड्याल र सुजन खतिवडाको जोडीले रजत हात पारे । प्रजापति दाहाल र धर्मराज ओझा तथा नीरबहादुर बस्नेत र श्याम अधिकारीको जोडीले कांस्यमा चित्त बुझाए । एकदिने उक्त प्रतियोगिताको पुरुष डबल्समा ४ जोडी तथा मिक्स डबल्समा ५ जोडीले सुपर लिगका आधारमा प्रतिस्पर्धा गरेका थिए ।
