चिप्लेढुङ्गा, चैत २७ : गण्डकी प्रदेशका मुख्यमन्त्री पृथ्वीसुब्बा गुरुङले बागलुङको धौलागिरि अस्पतालमा उपचाररत कोरोना सङ्क्रमित युवतीको स्वास्थ्यवस्था बुझ्नुभएको छ । मुख्यमन्त्री गुरुङले आज बिहान टेलिफोनमार्फत कुराकानी गरेर उनको स्वास्थावस्थाका बारेमा जानकारी लिनुभएको मुख्यमन्त्रीका प्रेस संयोजक विक्रम न्यौपानेले जानकारी दिनुभयो ।
न्यौपानेका अनुसार मुख्यमन्त्री गुरुङले उनलाई फोन गरी नआत्तिकन आत्मबल बढाएर उपचारमा रहन आग्रह गर्नुभएको हो । मुख्यमन्त्री गुरुङले युवतीसँगको कुराकानीमा मन दह्रो गरेर बसे छिट्टै निको हुने बताउँदै रोग निख्रेपछि मात्र घर जानुपर्ने सुझाव दिनुभएको न्यौपानेले जानकारी दिनुभयो ।
सङ्क्रमित युवतीले आफ्नो स्वास्थ्यावस्थामा क्रमिक सुधार हुँदै गएको र चिकित्सक एवम् स्वास्थ्यकर्मीले निरन्तर निगरानी गरिरहेको मुख्यमन्त्रीलाई जानकारी दिनुभएको थियो । यही चैत ४ गते बेल्जियमबाट कतार हुँदै काठमाडौं आउनुभएका उनीसँग बेल्जियमबाटै ६५ वर्षीया एक अर्की महिला पनि आउनुभएको थियो । त्यही दिन आन्तरिक उडानमार्फत पोखरा आउनुभएका उहाँहरु पोखराबाट जीप रिजर्भ गरेर बागलुङ पुग्नुभएको थियो ।
चैत ४ गते कतार एयरवेजमा आएकी युवतीमा कोरोना देखिएपछि वृद्धाको पनि स्वाब परीक्षण गरिएको थियो । स्वाबको नमूना पोजेटिभ देखिएपछि उहाँ अहिले बागलुङको धौलागिरि अञ्चल अस्पतालको आइसोलेशन वार्डमा उपचारत हुनुहुन्छ । उहाँसँगै आउनुभएकी बागलुङकै अर्की महिलामा पनि कोरोना संक्रमण देखिएपछि अहिले दुवै धौलागिरि अस्पतालको आइसोलेशन वार्डमा उपचार गराइरहनुभएको छ । पैँसट्ठी वर्षीया महिलामा दम रक्तचाप समस्या छ । युवतीको अवस्था सामान्य रहेको उपचारमा संलग्न डा प्रदीप श्रेष्ठले जानकारी दिनुभयो ।
गलकोट– नेपालमा पाँचौँ कोरोना संक्रमित बागलुङकी युवतीको स्वास्थ्यवस्थाबारे गण्डकी प्रदेशका मुख्यमन्त्री गुरुङले जानकारी लिनुभएको छ । मुख्यमन्त्री गुरुङले चैत १५ गते कोरोना पुष्टि भएसंँगै अञ्चल अस्पताल बागलुङको आइसोलेशन वार्डमा उपचार गराइराखेकी १९ वर्षिया युवतीलाई फोन गरी स्वास्थ्यावस्थाबारे जानकारी लिनुभएको मुख्यमन्त्रीका राजनीतिक सल्लाहकार गोविन्द नेपालीले जानकारी दिनुभयो ।
बेल्जियमबाट कतार हुँदै नेपाल आउनुभएका उहाँको स्वास्थ्यावस्था सामान्य रहेको मुख्यमन्त्रीसँगको कुराकानीमा युवतीले जानकारी दिइन् । मुख्यमन्त्री गुरुङले कोरोना संक्रमित युवतीलाई दुई मिनेट ३० सेकेण्ड फोनमा कुराकानी गर्दै पर्याप्त पानी पिउनसमेत सुझाव दिनुभएको छ । नआत्तिकन आइसोलेसनमा बस्न युवतीलाई मुख्यमन्त्रीले आग्रह गर्नुभयो ।
