बैतडी, असार ६ : जिल्ला भलिबल सङ्घ बैतडीको अध्यक्षमा जनकराज भट्ट चयन हुनुभएको छ । सदरमुकाम गढीमा आज सम्पन्न जिल्ला अधिवेशनबाट भट्ट जिल्ला अध्यक्षमा चयन हुनुभएको हो ।
यसैगरी उपाध्यक्षमा वसन्त प्रकाश विष्ट र प्रेमबहादुर चन्द चयन हुनुभएको छ । महासचिवमा लक्ष्मणसिंह भण्डारी, कोषाध्यक्षमा भूपेन्द्र चन्द निर्वाचित हुनुभएको छ । त्यस्तै सदस्यमा देवबहादुर महरा, चन्द्रसिंह भण्डारी, कैलाश थापा, धीरज चन्द, दिनेश सिंह ठगुन्ना, देवबहादुर चन्द र दुरा भट्ट रहेका छन् ।
नेपाल भलिबल सङ्घका केन्द्रीय सदस्य तथा निवर्तमान जिल्ला अध्यक्ष गाणेश सिंह ठगुन्ना, जिल्ला खेलकुद विकास समिति बैतडीका कार्यालय प्रमुख तर्कराज जोशी, भलिबल प्रशिक्षक हरिसिंह भण्डारीको रहोबरमा समिति पुनःगठन गरिएको हो ।
आजै पुनःगठित जिल्ला भलिबल सङ्घलाई सुदूरपश्चिम खेलकुद परिषद्मा दर्ता गर्नको लागि जिल्ला खेलकुद विकास समितिलाई सिफारिसका लागि अनुरोध गर्ने निर्णय पनि भएको छ ।
राष्ट्रिय खेलसमेत रहेको भलिबललाई यसको विकासका लागि सक्दो प्रयास गर्दै जाने नवनियुक्त अध्यक्ष भट्टको भनाइ छ । भलिबल सङ्घको प्रत्येक चार-चार वर्षमा अधिवेशन हुँदै आएको छ ।
