नवलपुर, जेठ ३ : नवलपरासी (बर्दघाट–सुस्तापूर्व)को हुप्सेकोट गाउँपालिकाको अध्यक्ष र उपाध्यक्ष पदमा नेपाली कांग्रेसका उम्मेदवार निर्वाचित भएका छन् । छ वटा वडा रहेको हुप्सेकोटमा सबै वडाध्यक्षसहित गाउँपालिका अध्यक्ष र उपाध्यक्षमासमेत कांग्रेसका उम्मेदवार निर्वाचित भएका हुन् ।
जिल्ला निर्वाचन अधिकारी लालप्रसाद शर्माकाअनुसार अध्यक्षमा कांग्रेसका उम्मेदवार लक्ष्मीदेवी पाण्डे निर्वाचित हुनुभएको हो । उहाँ यसअघि पनि अध्यक्षमा निर्वाचित हुनुभएको थियो । पाण्डेले छ हजार ४५५ प्राप्त गरी निर्वाचित हुँदा उहाँका प्रतिस्पर्धी नेकपा (एमाले)का चेतबहादुर रानाले पाँच हजार ७४१ मत प्राप्त गर्नुभयो । उपाध्यक्षमा कांग्रेसकै पूर्णसिंह राना निर्वाचित हुनुभएको छ । रानाले छ हजार ७०५ मत प्राप्त गर्दा उहाँका प्रतिस्पर्धी एमालेकी मनी पाण्डेले पाँच हजार ७३८ मत प्राप्त गर्नुभयो ।
