बैतडी, १९ चैत : यहाँको दशरथचन्द नगरपालिकाले नगरबस सञ्चालन गर्ने तयारी गरेको छ । बस खरिद गरेर ल्याइसकिएकाले यही चैत २४ गतेदेखि सञ्चालनको तयारी भएको हो ।
दशरथचन्द नगरपालिकाका सूचना अधिकारी राजेन्द्र विष्टले जिल्लामा दशरथचन्द नगरबस सञ्चालन गर्ने पहिलो नगरपालिका बन्ने बताउनुभयो । उहाँले भन्नुभयो, “बस खरिद गरेर ल्याइसकिएको छ । चैत २४ गते औपचारिक रूपमा उद्घाटन गरेर नियमित सञ्चालन गर्नेछौँ ।”
नगर प्रमुख पुष्करराज जोशी आफ्नो चुनावी नारामा गरिएको प्रतिबद्धता अनुसार नगरबस सञ्चालनको तयारी गरेको बताउनुभयो । बस सञ्चालनमा आएपछि पालिकासम्म आवतजावत गर्ने सर्वसाधारणलाई सहज हुने उहाँले विश्वास व्यक्त गर्नुभयो । उहाँका अनुसार उक्त बस काठमाडौँको सिपर्दी टेडिङ प्रालीले बोलपत्र आह्वानमार्फत रु ४३ लाख ९८ हजार २२९ मा खरिद गरिएको हो ।
न्यूनतम भाडामा सतबाँझ–झुलाघाट नियमित रूपमा सेवा दिनेगरी नगरबस सञ्चालन हुनेछ । यसका साथै नगरका अन्य वडामा पनि साताको एक दिन सेवा दिनेगरी सञ्चालनको तयारी भइरहेको नगर कार्यालयले जनाएको छ ।
