सिड्नी, १५ माघ : अस्ट्रेलियाका विज्ञानमन्त्री एड हुसिकले मङ्गलबार चीनको चर्चित एआई च्याटबट डीपसीकबारे गोपनीयताको चिन्ता व्यक्त गर्दै प्रयोगकर्ताहरूलाई यसलाई डाउनलोड गर्नुअघि राम्रोसँग सोच्न आग्रह गर्नुभएको छ ।
चीनस्थित प्रविधि स्टार्टअपद्वारा विकसित डीपसीक च्याटबटले गत हप्ता जारी भएयता उद्योग विशेषज्ञहरूलाई चकित पारेको छ र वित्तीय बजारहरूमा हलचल ल्याएको छ ।
धेरै कम लागतमा पश्चिमी प्रतिस्पर्धीहरूसँग टक्कर लिन सक्ने क्षमताका लागि प्रशंसित यो च्याटबटले बजार अग्रणी च्याटजीपीटीलाई पछि पार्दै एप डाउनलोड चार्टको शीर्षमा पुगेको छ । तर अस्ट्रेलियाका विज्ञानमन्त्री हुसिकले सावधानी अपनाउन आग्रह गर्नुभयो ।
“गुणस्तर, उपभोक्ता प्राथमिकता, डाटा र गोपनीयता व्यवस्थापनबारे समयक्रममा धेरै प्रश्नहरूको जवाफ दिन आवश्यक छ”, हुसिकले राष्ट्रिय प्रसारक एबीसीलाई भन्नुभयो, “म यसबारे धेरै सावधान रहन्छु । यस्ता विषयहरूलाई सावधानीपूर्वक मूल्याङ्कन गर्नुपर्छ ।”
हुसिकले चिनियाँ कम्पनीहरू प्रयोगकर्ता गोपनीयता र डाटा व्यवस्थापनको मामिलामा पश्चिमी प्रतिस्पर्धीहरूभन्दा कहिलेकाहीँ फरक हुने बताउनुभयो ।
“चिनियाँहरू धेरै राम्रोसँग काम गर्ने उत्पादनहरू विकास गर्न सक्षम छन् । त्यो बजार उनीहरूको डाटा र गोपनीयता सम्बन्धी दृष्टिकोणसँग परिचित छ”, उहाँले भन्नुभयो, “जब तपाईं यसलाई त्यस्ता बजारहरूमा निर्यात गर्नुहुन्छ जहाँ उपभोक्ताहरूको गोपनीयता र डाटा व्यवस्थापनबारे फरक अपेक्षाहरू छन्, प्रश्न यो हो कि ती उत्पादनहरूलाई उस्तै तरिकाले स्वीकार गरिने छ कि छैन, म सोच्छु तपाईं सावधान हुनुपर्छ, म यसबारे पूर्ण रूपमा स्पष्ट र प्रत्यक्ष भइरहेको छु ।”
अस्ट्रेलियाले सन् २०१८ मा राष्ट्रिय सुरक्षाको चिन्ता जनाउँदै चिनियाँ दूरसञ्चार दिग्गज हुवावेलाई आफ्नो राष्ट्रिय ५जी नेटवर्कबाट प्रतिबन्ध लगाएको थियो । रासस/एएफपी
