फैजाबाद (अफगानिस्तान), १० मङ्सिर : उत्तरी अफगानिस्तानको बदख्सान प्रान्तको कोक्चा नदीमा यात्रुवाहक गाडी खसी दुर्घटनाग्रस्त हुँदा कम्तीमा छ जनाको मृत्यु भएको प्रान्तीय सूचना तथा संस्कृति विभागले विज्ञप्तिमार्फत जनाएको छ ।
विज्ञप्तिका अनुसार आइतबार राति गाडी प्रान्तको राजधानी फैजाबाद सहरतर्फ गइरहेको अवस्थामा दुर्घटना भएको हो । स्थानीय बासिन्दा तथा उद्धारकर्ताहरू घटनास्थलमा पुगी घाइतेको उद्धार गर्नुका साथै शवहरू निकालेको विज्ञप्तिमा उल्लेख गरिएको छ ।
स्रोतका अनुसार गत हप्ता मात्र यही क्षेत्रमा यात्रुवाहक गाडी दुर्घटना हुँदा महिला तथा बालबालिकासहित आठ जना यात्रुहरूको ज्यान गएको थियो । (रासस/सिन्ह्वा)
