कोलम्बो, ७ कात्तिक (रासस/एएफपी) : श्रीलङ्काले बुधबार अमेरिकी दूतावासले सम्भावित आक्रमणको चेतावनी दिएपछि लोकप्रिय सर्फिङ शहरमा रहेको यहुदी सामुदायिक केन्द्र वरिपरि सेना परिचालन गरेको छ र प्रहरी गस्ती बढाएको छ ।
पूर्वी अरुगम बेमा इजरायली स्वामित्वका व्यवसायहरूको बहिष्कारका लागि सामाजिक सञ्जालमा आह्वान गरिएपछि सुरक्षा र चेतावनी बढाइएको हो ।
“इजरायलीहरूले सञ्चालन गरेको ‘चाबाद हाउस’ नामक स्थान लक्षित हुन सक्ने जानकारी थियो र हामीले सुरक्षा बलियो बनाउने उपायहरू अपनाएका छौँ”, प्रहरी प्रवक्ता निहाल थल्दुवाले भन्नुभयो ।
उहाँले चाबाद हाउस भ्रमण गर्ने यहुदी पर्यटक र बेको मुस्लिम बहुल जनसङ्ख्याबीच हालैका दिनहरूमा तनाव रहेको बताउनुभयो ।
सेना र नौसेनाका साथै प्रहरी कमान्डोहरूलाई क्षेत्रमा गस्ती बढाउन र चेकपोइन्टहरू सम्हाल्न परिचालन गरिएको छ ।
गाजा र लेबनानमा इजरायलले इरान समर्थित हमास र हिजबुल्लाहविरुद्ध गरेको लडाइँको विरोधमा स्थानीय मुस्लिम समूहहरूले गरेका प्रदर्शनहरूले मुख्यतया बौद्ध धर्मावलम्बी रहेको यस दक्षिण एसियाली राष्ट्रको व्यापक समुदायको समर्थन पाएको छ ।
यस वर्षको पहिलो नौ महिनामा श्रीलङ्कामा भ्रमण गर्ने १५ लाख पर्यटकमध्ये इजरायलीहरूको सङ्ख्या एक दशमलव पाँच प्रतिशतभन्दा कम अर्थात करिब २० हजार थियो ।
तर कोलम्बोबाट सडक मार्ग हुँदै चार सय किलोमिटर पूर्वमा अवस्थित सर्फिङको हटस्पट अरुगम बे इजरायली पर्यटकहरूको लोकप्रिय गन्तव्य हो ।
तत्काल खतराको दुर्लभ सूचनामा अमेरिकी दूतावासले बुधबार ‘पूर्वी अरुगम बेमा लोकप्रिय पर्यटकीय स्थलहरूलाई लक्षित गरी आक्रमण हुने चेतावनी दिने विश्वसनीय जानकारी प्राप्त गरेको’ बताएको छ ।
बेलायत र क्यानाडाले आफ्ना वेबसाइटहरूमा अमेरिकी चेतावनी साझा गरेका छन् भने रुसी दूतावासले आफ्ना नागरिकहरूलाई श्रीलङ्का भ्रमण गर्दा भीडभाड भएका ठाउँहरूबाट टाढा रहन सल्लाह दिएको छ ।
यसैबीच इजरायलको राष्ट्रिय सुरक्षा परिषद् (एनएससी) ले ‘पर्यटकीय र तटीय क्षेत्रहरूमा विश्वसनीय आतङ्कवादी खतराहरूका कारण श्रीलङ्काका लागि यात्रा चेतावनी स्तर बढाएको छ’ ।
इजरायलले अरुगम बे र अन्य समुद्री तटहरूमा रहेका आफ्ना नागरिकहरूलाई ‘देश छोड्न वा कम्तीमा स्थानीय सुरक्षा बलहरूको उच्च उपस्थिति भएको राजधानी कोलम्बोमा जान’ आग्रह गरेको छ ।
– नयाँ हटलाइन –
पैँतालिस विदेशी नागरिक सहित दुई सय ७९ जनाको ज्यान लिएको सन् २०१९ को इस्टर सन्डे बम विस्फोटपछि श्रीलङ्कामा कुनै आक्रमण भएको छैन ।
तीन वटा विलासी होटल र तीन वटा चर्चविरुद्ध भएको समन्वित आक्रमण इस्लामिक स्टेट समूहप्रति वफादारी जनाएको एक स्थानीय जिहादी समूहको काम भएको आरोप लगाइएको थियो ।
त्यसपछि पर्यटक सङ्ख्यामा तीव्र गिरावट आएको थियो र सन् २०२२ को आर्थिक मन्दीले व्यापक नागरिक अशान्ति निम्त्याएपछि अझै प्रभावित भएको थियो ।
तर गत वर्ष अन्तर्राष्ट्रिय मुद्रा कोषको राहत प्याकेजले अर्थतन्त्र स्थिर पार्न मद्दत गरेपछि विदेशी पर्यटकहरूको सङ्ख्या बढेको छ ।
अमेरिकी दूतावासको चेतावनीपछि प्रहरीले मुलुकभर पर्यटकहरूको सुरक्षाका लागि नयाँ सुरक्षा योजना सार्वजनिक गर्ने बताएको छ ।
“मध्यपूर्व र पूर्वी युरोपको युद्ध परिस्थितिलाई मध्यनजर गर्दै प्रहरी गुप्तचर निकायहरूसँग मिलेर पर्यटक र रिसोर्टहरूको सुरक्षाका लागि एउटा योजनामा काम गरिरहेको छ”, श्रीलङ्का प्रहरीद्वारा जारी विज्ञप्तिमा उल्लेख छ ।
विज्ञप्तिले विस्तृत विवरण दिएको छैन तर पर्यटकहरूले कुनै पनि सुरक्षासम्बन्धी चिन्ताहरूका बारेमा अधिकारीहरूलाई सचेत गराउन एउटा हटलाइन स्थापना गरिएको जनाएको छ ।
