काठमाडौं, ६ पुस : निर्देशक दीपक श्रेष्ठको नयाँ चलचित्र ‘पर्खी बसें तिमीलाई’ को दुई नयाँ पोस्टर सार्वजनिक गरिएको छ । पुस २७ मा प्रदर्शन गरिने तय भएको चलचित्रको दुई पोस्टर मध्ये एकमा प्रेम भाव देखाइएको छ भने दोस्रोमा प्रेमले निम्त्याउने वेदना प्रस्तुत गरिएको छ ।
‘पर्खी बसें तिमीलाई’ मार्फत अभिनेतामा किरण श्रेष्ठ र अभिनेत्रीमा रक्षा बुढाथोकीले डेब्यु गर्दै हुनुहुन्छ । दुई पोस्टरमार्फत एउटामा दुई कलाकारको प्रेम र अर्कोमा सम्पूर्ण कलाकारको भावना प्रस्तुत गरिएको निर्देशक श्रेष्ठले बताउनुभयो ।
चलचित्रमा लोकप्रिय गीत ‘कालो चस्मा लाउ है मैया’ रिमेक गरिएको छ। चलचित्र ‘बादलपारी’ मा समावेश लोकप्रिय गीतको रिमेकमा सुरेन्द्र राणाको शब्द र शम्भुजित बाँस्कोटाको सङ्गीत रहेको छ ।
गीतलाई गायक प्रमोद खरेल र गायिका मिलन नेवारले गाउनुभएको छ । रोमान फिल्म र तपश्री फिल्म (सिक्किम) को संयुक्त व्यानरमा निर्माण गरिएको चलचित्रमा अनिशा रसाइली, शिव श्रेष्ठ, बिल्सन बिक्रम राई, सुनिता श्रेष्ठ लगायतका कलाकारले अभिनय गर्नुभएको छ ।
