काठमाडौँ, ११ असार : यही महिनाको अन्तिममा रिलिज हुने नेपाली चलचित्र ‘बगान’को गीत सार्वजनिक भएको छ । ‘न वारमा छु, न पारमा छु’ बोलको गीतमा सुरेश वाग्लेको शब्द रचना, हरि लम्सालको सङ्गीत र अञ्जु पन्तको स्वर रहेको छ । भिडियोमा अभिनेतृ करिश्मा मानन्धरलाई प्रमुख स्थान दिइएको छ ।
गीतमा चलचित्रभित्र करिश्मा मानन्धरको जीवनकथा समेट्ने दृश्यहरू समावेश गरिएको छ । काखे छोरी हुर्काउँदै एकल जिन्दगी बिताउनु पर्दाका विभिन्न भोगाइ यो गीत हेर्दा महसुस हुन्छ । अभिनेतृ मानन्धरलाई एकल महिलाका रूपमा चित्रण गरिएको यो चलचित्रलाई अभिनेता सरोज खनालले निर्देशन गरेका छन् ।
चलचित्रमा सरोज खनाल, करिश्मा मानन्धर, आकाश श्रेष्ठ, नव अभिनेत्री प्रमिला कार्कीसँगै नीर शाह, बसुन्धरा भुसाल, मिथिला शर्मालगायतको अभिनय छ । स्वप्न नीरवको कथामा आधारित यो चलचित्रबाट अभिनेता खनालले निर्देशनमा र अभिनेत्री कार्कीले अभिनयमा डेब्यु गर्नुभएको हो । नेपाली वेबसाइट डटकमको प्रस्तुति रहेको ‘बगान’ का निर्मातामा सुरेश वाग्ले र कार्यकारी निर्मातामा विनोद मानन्धर रहनुभएको छ ।
