भक्तपुर, २८ जेठ : भक्तपुरमा जारी राष्ट्रव्यापी खुल्ला पुरुष भलिबल प्रतियोगिताको सेमिफाइनल समीकरण पूरा भएको छ ।
ॐ सृजनशील समाजको आयोजनामा सूर्यविनायक नगरपालिका–४ हर्षचोकमा शनिबारदेखि आयेजित राष्ट्रव्यापी खुला पुरुष भलिबल प्रतियोगितामा आज न्यूटन एकेडेमी, ॐ श्रृजनशीलल समाज, लिखु टिम र गणतान्त्रिक खेलकुद महासङ्घ सेमिफाइनलमा आफ्नो स्थान सुरक्षित गर्न सफल भएका छन् ।
आज सम्पन्न क्वार्टरफाइनलमा आयोजक ॐ श्रृजनशील समाजले गान्धी आदर्श टिमलाई २५–१९ र २५–१६ को सोझो सेटमा पराजित गर्दै सेमिफाइनलमा स्थान पक्का गरेको हो । त्यसैगरी न्युटन एकेडेमीले कागेश्वरी मनोहरालाई २५–१६ र २५–१८ को सोझो सेटमा पराजित गरी सेमिफाइनलमा स्थान बनाएको छ । गणतान्त्रिक खेलकुद महासङ्घ भक्तपुर जिल्ला खेलकुद विकास समिति टिमलाई २५–१० र २५–२१ ले पराजित गर्दै सेमिफाइनलमा पुगेको छ । त्यस्तै लिखु–८ लिखु सेवा समाजलाई २५–२३ र २६–२४ ले पछि पार्दै सेमिफाइनलमा प्रवेश गरेको छ ।
प्रतियोगिता आयोजक समितिका संयोजक पेशल आचार्यका अनुसार शनिबारदेखि सुरू भएको प्रतियोगितामा आठ जिल्लाका १० टिमको सहभागिता छ । सोमबारसम्म चल्ने प्रतियोगिताको उद्घाटनमा सूर्यविनायक नगरपालिकाका नगरप्रमुख वासुदेव थापाले नगरपालिकाले खेलको विकासका लागि बजेट विनियोजन गरेको बताउनुभयो ।
प्रतियोगितामा प्रथम हुनेलाई रु ५० हजार, दोस्रो हुनेलाई २५ हजार, तेस्रो हुनेलाई १५ हजार र सान्त्वना हुनेलाई १० हजार पुरस्कार, शिल्ड, प्रमाणपत्र र मेडल प्रदान गरिने उहाँले जानकारी दिनुभयो ।
