काठमाडौँ, १७ वैशाख : कार्यवाहक राष्ट्रपति रामसहायप्रसाद यादवले आयुर्वेदिक चिकिस्ता पद्धति मात्र नभएर जीवन दर्शन रहेको बताउनुभएको छ । आयुर्वेदा मेडिकल डेभलोपमेन्ट एण्ड रिसर्च फाउण्डेशनले काठमाडौँस्थित नाचघरमा आज आयोजित कार्यक्रममा उहाँले संस्कृति र दैनिकीसँग जोडिएको आयुर्वेद सबै चिकिस्ता विज्ञानको जननी रहेको बताउनुभयो ।
“विश्वका करिब ८० प्रतिशत मानिसले परम्परागत वा वैकल्पिक चिकिस्ता प्रयोग गरिरहेका छन् । हाल आयुर्वेद अनुसन्धान, अध्ययन र अभ्याससँगै माग पनि बढिरहेको छ । यद्यपि स्वदेशमा आयुर्वेद क्षेत्रको विकास अपेक्षाकृत नभएको होकी भन्ने लाग्छ । तर युवाको सहभागिता देख्दा भविष्यप्रति आशावादी छु”, उहाँले भन्नुभयो, “आयुर्वेदमा भनिएको जस्तो हाम्रो दैनिकी भएमा यसले स्वास्थ्य बनाउनुका साथै दीर्घ जीवनसमेत दिन्छ । यसलाई हामीले आफ्नो जीवनको अभिन्न अङ्ग बनाउन सक्नुपर्छ ।” उहाँले आधुनिक चिकिस्ता महँगो र सबैको पहँुचमा नरहेको हुँदा रोग रोकथामको लागि आयुर्वेदमा उल्लेखित स्वास्थ्य जीवनशैलीका कुरालाई समुदायस्तरमा लैजान आग्रह गर्नुभयो ।
कार्यक्रममा काठमाडौँ महानगरपालिका प्रमुख बालेन्द्र शाहले आयुर्वेदमा कार्यरत चिकित्सकलाई सम्मान गर्न पाउँदा खुसी लागेको बताउनुभयो । “नेपालमा विदेशी पर्यटक नै योग, आयुर्वेद र ध्यानको लागि आउने गरेको उदाहरण पनि छन् । त्यसैले हामीले यस क्षेत्रलाई प्रवद्र्धनमा अझै जोड दिनुपर्छ । यसको अध्ययन नै अन्य विद्या झै प्राथमिकतामा पार्नुपर्छ”, महानगर प्रमुख शाहले भन्नुभयो ।
