काठमाडौं, माघ २ : सरकारको उच्चस्तरीय राजनीतिक संयन्त्रको बैठक आज सोमबार दिउँसो ५ बजे बस्दैछ । उपप्रधान तथा अर्थमन्त्री विष्णु पौडेलले नेकपा (एमाले) अध्यक्ष केपी शर्मा ओली संयोजक रहनुभएको उच्चस्तरीय राजनीतिक संयन्त्रको बैठक केही बेरमा बस्न लागेको जानकारी दिनुभएको हो ।
बालकोटमा सञ्चारकर्मीसँग कुरा गर्नुहुँदै उहाँले भन्नुभयो, “प्रधानमन्त्री र उच्चस्तरीय राजनीतिक संयन्त्रका संयोजकज्युको भेटघाट सम्पन्न भएको छ । केही समयपछि आजै ५ बजे संयन्त्रको बैठक बस्दैछ । एकसरो गृहकार्य गरेर बाँकी निर्णय हुनेछन् ।”
अहिलेको सरकारलाई विश्वासका मत दिने सबै दल र नेताहरुसँग भोलि मंगलबार सर्वदलीय बैठक आयोजना गरिएको उहाँले बताउनुभयो । अर्थमन्त्री पौडेलले भन्नुभयो, “भोलिका लागि भनिएको बैठक सर्वदलीय बैठक हो । प्रतिनिधिसभामा प्रतिनिधित्व गर्ने, विश्वासको मत दिने । विचार सुन्ने र हाम्रो कुरा पनि सुनाउने छौं ।”
प्रधानमन्त्री पुष्पकमल दाहाल ‘प्रचण्ड’ नेतृत्वको अहिलेको सरकार राजनीतिक दलका नेताहरुबीच भएको सहमतिअनुरुप अघि बढ्ने उहाँले बताउनुभयो । “त्यो चाँहि, म के स्पष्ट गरौं भने, जेजस्ता राजनीतिक दलका नेताहरुबीच सहमतिमा बनेको छ, द्रुतगतिमा अघि बढ्छ” अर्थमन्त्री पौडेलले भन्नुभयो । आज प्रधानमन्त्री प्रचण्ड र एमाले अध्यक्ष ओलीबीच बिहानदेखि दिउँसो २ः४५ सम्म छलफल चलेको थियो ।
स्रोत : गोरखापत्र अनलाइन
