काठमाडौँ, मङ्सिर ४ : आज बिहान ७ देखि साँझ ५ बजेसम्मका लागि निर्धारित प्रतिनिधिसभा तथा प्रदेशसभा सदस्य निर्वाचनको समय सकिएको छ । निर्वाचन आयोगका अनुसार मतदानको विवरण आउने क्रम जारी छ ।
केही सामान्य घटनाबाहेक शान्तिपूर्ण र उत्साहपूर्वक मतदान भएको छ । निर्धारित समय सकिए पनि मतदान केन्द्रको हाताभित्र लाइनमा रहेका मतदाताले मतदान गर्न पाउनेछन् । मधेस प्रदेशमा कुनै पनि मतदान केन्द्रमा मतदान स्थगन नभई सम्पन्न भएको छ ।
हालसम्मको प्रारम्भिक विवरणअनुसार करिब ६० प्रतिशत मतदान भएको छ । दल र उम्मेदवारहरूबीचको विवादका कारण बाजुरा, सुर्खेत, ताप्लेजुङ, नवलपरासी पूर्व, गुल्मी, दोलखालगायतका जिल्लाका केही मतदान केन्द्रमा मतदान अवरुद्ध भएको छ । बाजुरामा हिंसात्मक घटना भएको जानकारी आएको छ ।
केही केन्द्रमा मतदान जारी
विभिन्न मतदानकेन्द्रमा विविध कारणले ढिला मतदान सुरु भएको, विवाद हुँदा सहमति कायम गर्न समय लागेको र कतिपय मतदान केन्द्रमा झडप हुँदा मतदानकार्य बीचमा रोकिएर पुनः सुरु भएकाले विभिन्न मतदान केन्द्रमा अहिले मतदान जारी रहेको निर्वाचन आयोगले जनाएको छ ।
