सुदूरपश्चिम, साउन २ : सुदूरपश्चिम प्रदेशसभाको आजको बैठकमा ‘सुदूरपश्चिम प्रदेश अनुसन्धान तथा प्रशिक्षण प्रतिष्ठान ऐन, २०७७’ लाई संशोधन गर्न बनेको विधेयकमाथि छलफल भएको छ ।
छलफलमा भाग लिने प्रदेशसभाभ सदस्यले अहिलेसम्म बनेका ऐनको कार्यान्वयनको पक्ष कमजोर रहेको भन्दै त्यसतर्फ सदन र सरकार सचेत हुनुपर्ने बताउनुभयो । उहाँहरुले ऐन बनेको एक वर्षभित्र यसलाई संशोधन गर्नुपर्ने अवस्था आउनुमा विधेयकको मस्यौदा बनाउँदा नै कमीकमजोरी देखिएको बताउनुभयो । छलफलमा लालबहादुर खड्का, भरतबहादुर खड्का र अक्कलबहादुर रावलले भाग लिनुभएको थियो ।
यसअघि सामाजिक विकास राज्यमन्त्री टेकबहादुर रैका आउजीले ‘सुदूरपश्चिम प्रदेश अनुसन्धान तथा प्रशिक्षण प्रतिष्ठान ऐन, २०७७ लाई संशोधन गर्न बनेको विधेयक’ माथि छलफल गरियोस् भन्ने प्रस्तावलाई बैठकले सर्वसम्मतिले स्वीकृत गरेको थियो ।
बैठकमा आर्थिक मामिलामन्त्री प्रकाश रावलले प्रदेश आर्थिक कार्यविधि तथा वित्तीय उत्तरदायित्वका सम्बन्धमा व्यवस्था गर्न बनेको विधेयकलाई सभासमक्ष टेबुल गर्नुभएको थियो ।
