गलकोट, जेठ १९ : बागलुङका स्थानीय तहको बजेट रु ४७ करोडले बढेको छ । बागलुङ जिल्लाका १० स्थानीय तहका लागि सङ्घीय सरकारले आगमी वर्षका लागि रु ४७ करोड बजेट बढाएर पढाएको हो ।
चालू आवको तुलनामा आगमी आवका लागि नौ पालिकाको बजेट बढाइएको हो भने भने एक पालिकामा बजेट घटेको छ । जिल्लाको काठेखोला गाउँपालिकाको बाहेक सबै पालिकाको बजेट बढेर आउने भएको हो ।
आगमी आर्थिक वर्षका लागि सङ्घीय सरकारबाट वित्तीय समानीकरण, सशर्त, विशेष र समपूरक अनुदान गरी रु चार अर्ब ३४ करोड ८१ लाख बजेट विनियोजन गरेको छ । जुन चालू आवको तुलनामा रु ४७ करोड बढी हो । बजेट बढेपछि यहाँका पालिकालेसमेत बजेट बढाएर योजना तथा कार्यक्रम ल्याउने योजनामा जुटेका छन् । सङ्घीय मात्रै हैन प्रदेशको बजेटसमेत चालू वर्षको तुलनामा बढेर आउने देखिन्छ ।
यस्तै स्थानीय तहलेसमेत आन्तरिक आम्दानीलाई बढाउँदै गएका छन् । उनीहरुले करको दायरा बढाउँदै आन्तरिक आम्दानी बढाउँदा बागलुङका पालिकाको बजेट उकालो लाग्ने देखिन्छ । जिल्लाका चार नगरपालिका र ६ गाउँपालिकालाई सङ्घीय सरकारले आर्थिक वर्ष २०७९/८० का लागि बजेटको बाँडफाँट गर्दा चालू आवको तुलनामा आगामी आवको बजेट बढाइएको हो । चालू आवका लागि सङ्घीय सरकारबाट यहाँका दश स्थानीय तहलाई रु तीन अर्ब ८७ करोड ७५ लाख बजेट प्राप्त भएको थियो ।
यस्तै आर्थिक वर्ष २०७७÷७८ मा सङ्घीय सरकारले बागलुङलाई रु तीन अर्ब ५७ करोड ९८ लाख बजेट विनियोजित गरेको थियो । जिल्ला आउने सङ्घीय सरकारको बजेट विस्तारै बढेर आउन थालेको देखिन्छ । बागलुङ नगरको सबैभन्दा बढी रु १० करोड बजेट चालूको तुलनामा बढेर आएको छ ।
स्थानीय तहले सङ्घीय बजेट आइसेपछि प्रदेशको बजेटमा योजना छनोट र प्रदेशले बजेट विनियोजन गरेपछि आफ्नो बजेट निर्माणमा जुट्ने छन् । अहिले पालिकाले वडा तहबाटै टोल भेला गरेर बजेटका लागि योजना तथा कार्यक्रम माग्दै आएका छन् ।
बागलुङका लागि चालु आवको बजेटभन्दा आगामी आवका लागि रु ४७ करोड ६ लाख बजेट बढेर आएको अर्थ मन्त्रालयले जनाएको छ । उक्त नगरलाई आगामी आवका लागि रु ८५ करोड २५ लाख बजेट विनियोजन गरिएको हो । बागलुङमा चालू आवमा सङ्घीय सरकारको बजेट रु ७४ करोड ७२ लाख बजेट प्राप्त भएको थियो । चालू आवको तुलनामा आगामी आवमा बागलुङको बजेट रु १० करोड ५३ लाख बढी बजेट बिनियोजन भएको छ ।
यस्तै गलकोट नगरपालिकालाई आगामी आवका लागि रु ५१ करोड एक लाख बजेट विनियोजन भएको छ । उक्त नगरका लागि चालू आवमा रु ४७ करोड ४८ लाख बजेट विनियोजन भएको थियो । चालू आवको तुलनामा गलकोटको बजेट रु चार करोड ३७ लाख बढेर बजेट बढाइएको हो ।
यस्तै जैमिनी नगरमा आगामी आवका लागि रु ५२ करोड २४ लाख बजेट बिनियोजन भएको छ । उक्त नगरमा चालू आवमा सङ्घीय सरकारबाट रु ४९ करोड ५७ लाख प्राप्त भएको थियो । आगामी आवमा सङ्घीय सरकारबाट यस नगरलाई रु दुई करोड ६७ लाख बजेट बढेको हो ।
त्यस्तै ढोरपाटन नगरमा आगामी आवका लागि रु ३७ करोड एक लाख बजेट विनियोजन भएको छ । चालू आवमा सोही पालिकामा रु ३२ करोड ७० लाख विनियोजन भएको थियो । जुन गत वर्षको तुलनामा रु चार करोड ३१ लाख रकम बढी हो ।
यसैगरि काठेखोला गाउँपालिकालाई आगामी आवका लागि रु ३९ करोड ७६ लाख बजेट विनियोजन भएको छ । उक्त पालिकाको चालू आवमा सङ्घीय सरकारले रु ४१ करोड ५८ बजेट विनियोजन गरेको छ । यस गाउँपालिकामा चालू आवको तुलनामा आगामी आवमा रु एक करोड ८२ लाख बजेट घटेर आएको छ ।
