काठमाडौँ, जेठ ५ : काठमाडौँको चन्द्रागिरि नगरपालिकाको प्रमुखमा गठबन्धनको तर्फबाट नेपाली कांग्रेसका उम्मेदवार घनश्याम गिरी विजयी हुनुभएको छ ।
वैशाख ३० गते सम्पन्न मतदानको केहीबेर अगाडि सम्पन्न मतगणनामा नेकपा (एमाले)का उम्मेदवार उत्तमबहादुर राउतलाई पराजित गर्दै गठबन्धनका उम्मेदवार गिरी निर्वाचित हुनुभएको हो । विजयी गिरीले १५ हजार ४७५ मत ल्याउँदा उहाँका प्रतिद्वन्द्वी राउतले १४ हजार ६५१ मत प्राप्त गर्नुभएको निर्वाचन अधिकृत सिर्जना थपलियाले राससलाई जानकारी दिनुभयो ।
यस्तै राष्ट्रिय प्रजातन्त्र पार्टीका उम्मेदवार अजय श्रेष्ठले एक हजार २१४ मत प्राप्त गर्नुभएको छ । उक्त नगरपालिकाको प्रमुखमा १७ जनाले उम्मेदवारी दिनुभएको थियो । विजयी गिरी यसअघि पनि सोही नगरपालिकाको प्रमुख हुनुहुन्थ्यो ।
उपप्रमुखमा नेकपा एमालेकी वसन्ती श्रेष्ठ निर्वाचित हुनुभएको छ । विजयी श्रेष्ठले १५ हजार ५६४ मत प्राप्त गर्दा उहाँका प्रतिद्वन्द्वी गठबन्धनका उम्मेदवार राष्ट्रिय जनमोर्चाका रोशन दानीले चार हजार ४५९ मत प्राप्त गर्नुभएको छ ।
उक्त नगरपालिकाको उपप्रमुखमा १० हजारभन्दा बढी मत बदर भएको थियो । कूल १५ वडा रहेको चन्द्रागिरिमा कूल ४७ हजार २६४ मतदाता रहेकामा यो स्थानीय तहको निर्वाचनमा ३६ हजार ७०३ मत खसेको निर्वाचन कार्यालय चन्द्रागिरिले जनाएको छ । चन्द्रागिरि काठमाडौँ उपत्यकाभित्रकै सबैभन्दा ठूलो नगरपालिका हो ।
