कञ्चपुर, जेठ ३ : बेलौरी नगरपालिकाको नगरप्रमुखमा नेकपा (माओवादी केन्द्र) का पोतिलाल चौधरी दोस्रो कार्यकालका लागि निर्वाचित हुनुभएको छ । चौधरी यसपटक फराकिलो मतान्तरले नगरप्रमुखमा निर्वाचित हुनुभएको हो । उहाँले नेकपा एमालेका उम्मेदवार कमला बोहरालाई दुई हजार ८४ मत अन्तरले पराजित गर्नुभयो ।
चौधरीले नगरप्रमुखमा आठ हजार ८३७ मत ल्याउनुभएको छ । उहाँका निकटतम प्रतिद्वन्द्वी बोहराले छ हजार ८०३ मत प्राप्त गर्नुभयो । त्यसैगरी नेपाली कांग्रेसका हरेन्द्र विष्टले छ हजार ३१२ मत ल्याउनुभयो । अघिल्लो निर्वाचनमा एमालेका पल्लवराज भट्ट चौधरीसित ३०० मत अन्तरले पराजित भएका थिए ।
उपप्रमुखमा एमालेका जोगराम चौधरी सात हजा ५८३ मत ल्याई निर्वाचित हुनुभएको छ । उहाँका निकटतम प्रतिद्वन्द्वी माओवादी केन्द्रका मन्जु शाहले छ हजार ८३५ मत ल्याउनुभएको छ । त्यस्तै कांग्रेसका खिना भण्डारीले छ हजार ६१३ मत ल्याउनुभयो ।
