फुङ्लिङ, जेठ २ : गालामा रातो अबीर खादै खादाले भरिएको घाँटी । हातमा पार्टीका झण्डा । सयौँको भीडभाड । वर्षा हुँदा पनि खुसीमा रमाउँदै नाचगान गरेकोे यो दृश्य ताप्लेजुङको सदरमुकाम फुङ्लिङ बजारको हो।
गए रातिदेखि ताप्लेजुङमा वर्षा भइरहेको छ भने शुक्रबार सम्पन्न स्थानीय तहको मतपरिणाम आउने क्रम पनि जारी छ । सदरमुकाम फुङ्लिङमा रहेको मुख्य निर्वाचन अधिकृतको कार्यालय परिसरमा विजय उत्सव मनाउनेकोे भीड छ । विजय उत्सवसँगै गीत बजाउँदै र¥यालीसहित फुङ्लिङ बजार परिक्रमा गर्नेको भीड पनि लागेको छ ।
फुङ्लिङ नगरपालिकामा ११ वटा वडासहित प्रमुख र उपप्रमुखको विजयमा १२ पटक विजय जुलस निस्किने भएको छ । अहिले छ वटा वडाको मतगणना सम्पन्न भएको र छ पटक नै विजयोत्सवको जुलुसले विभिन्न नारा लगाउँदै फुङ्लिङ बजार परिक्रमा गरेका र अझै विजयोत्सवका जुलुस निस्कने क्रम जारी छ ।
गए रातिदेखि निरन्तर वर्षा भइरको छ । वर्षाले निथ्रुकै भिजेर पनि खुसीयालीका साथ नेता, कार्यकर्ता र जनसमुदायसमेत विजयोत्सवमा सहभागी हुँदै आएका छन् । सदरमुकाममा मात्र होइन जिल्लाको नौ स्थानीय तहको केन्द्रमा स्थापना भएको निर्वाचन अधिकृतको कार्यालयको परिसरमा पनि विजयोत्सव मनाउँनेको भीड उस्तै छ ।
फक्ताङलुङ गाउँपालिकाको अध्यक्ष पदमा माओवादी केन्द्र र उपाध्यक्षमा नेपाली कांग्रेसले विजय प्राप्त गरेसँगै यतिखेर विजयको उत्सव मनाउनेको भीड लागेको छ । सो गाउँपालिकामा माओवादी केन्द्र र नेपाली कांग्रेसको गठबन्ध रहेको थियो ।
उता मेरिङदेन गाउँपालिकाको अध्यक्ष पदमा नेपाली कांग्रेस विजयी भएपछि विजयोत्सव मनाउन थालिएको छ । उपाध्यक्षमा एकीकृत समाजवादी विजयी भएको छ । वडाध्यक्षमा विजय भएसँगै वडा–वडामा समेत विजयोत्सव मनाउन सुरुभएको छ । सात स्थानीय तहमा मतगणना जारी रहेको जिल्ला निर्वाचन कार्यालयले जनाएको छ ।
