काठमाडौँ, मङ्सिर ११ : नेपाली खेलकुदको कार्यकारी निकाय राष्ट्रिय खेलकुद परिषद् (राखेप) को सदस्य सचिव पदका लागि कीर्तिमानी तेक्वान्दो खेलाडी दीपक बिष्टसहित १८ जनाको आवेदन परेको छ ।
युवा तथा खेलकुद मन्त्रालयले सदस्य सचिव पदको लागि एक साताअघि दर्खास्त आह्वान गरेको थियो । दर्खास्त दिने अन्तिमदिन शुक्रबारसम्म १८ जनाको आवेदन परेको हो । खेलकुदलाई सही ढंगले अगाडी बढाउन सक्छु भन्ने हेतुले आफुले आवेदन दिएको दीपक बिष्टले बताउनुभयो ।
‘एउटा खेलाडीको रुपमा मैले खेलकुदको बास्तविकता धेरै बुझेको छु । खेलकुदमा ३० बर्ष खेलाडी र प्रशिक्षक भएर बिताए । मलाई ब्यवस्थापकको रुपमा खेलकुदमा अझै राम्रो र प्रभावकारी काम गर्न सक्छु भन्ने लाग्छ । खेलकुद नै मेरो जीवन हो । खेलकुदमै अझै केही गर्न मन छ,’ बिष्टले भन्नुभयो ।
बिष्ट नेपाललाई दक्षिण एसियाली खेलकुद (साग) मा लगातार चार स्वर्ण दिलाउने कीर्तिमानी खेलाडी हुनुहुन्छ । उहाँ ओलम्पिकमा छनोट यात्रा तय गरेर सहभागी हुने नेपालका दोस्रो तेक्वान्दो खेलाडी पनि हुनुहुन्छ । छनोट चरण पारगर्दै ओलम्पिकमा सहभागी पहिलो खेलाडी भने तेक्वान्दोकी संगीना वैद्य हुनुहुन्छ ।
तेक्वान्दो खेलाडी बिष्टसँगै सदस्य सचिव पदका लागि आवेदन दिनेहरुमा डा.अच्युत लामिछाने, आरके बिष्ट, रविराज कर्णिकार, ममता श्रेष्ठ, मानबहादुर गुरुङ, सुदिल शाही, टंकलाल घिसिङ, विनोदकुमार यादव, भरत महर्जन, देवराज चौलागाई, राजकुमार कार्की, दिलकुमारी नेपाल, जगतमान श्रेष्ठ, सिद्धार्थ लामा, भरत चालिसे, छुम्बी लामा र सुनिल नकर्मी हुनुहुन्छ ।
सरकार परिवर्तनसँगै रमेशकुमार सिलवाल सदस्यसचिवको पदबाट बर्खास्त भएपछि युवा तथा खेलकुद मन्त्रालयले खुला प्रतिस्पर्धामार्फत नयाँ सदस्य सचिव नियुक्तिका लागि दर्खास्त आह्वान गरेको थियो । आवेदन दिनेहरुलाई युुवा तथा खेलकुद मन्त्रालयद्वारा गठित छनोट समितिले आइतबार आफ्नो भावी कार्ययोजना र कार्यक्रम प्रस्तुतीका लागि मन्त्रालय बोलाएको आवेदक मध्येका डा.अच्युत लामिछाने बताउनुभयो ।
राखेप सदस्य सचिव बन्न इच्छुकले आफ्नो कार्य योजनासहित आवेदन बुझाउनु पर्ने प्रावधान राखिएको छ । नयाँ राष्ट्रिय खेलकुद विकास ऐन २०७७ लागू भएपछि दोस्रो पटक खुला छनोट प्रक्रियाबाट राखेपको सदस्य सचिव छनोट गरिन लागिएको हो । नयाँ ऐन अनुसार एक बर्षअघि खुला छनोट प्रक्रियाबाट तत्कालीन केपी शर्मा ओली नेतृत्वको सरकारले रमेशकुमार सिलवाललाई पहिलो पटक राखेप सदस्य सचिव नियुक्त गरेको थियो । त्यतिबेला पनि २७ जनाले आवेदन दिएका थिए ।
सदस्य सचिव छनोटका लागि युवा तथा खेलकुद मन्त्री महेश्वरजंग गतहराजले मन्त्रालयका सहसचिव कमलप्रसाद पोखरेलको संयोजकत्वमा कमला ज्ञावली र हरिबहादुर श्रेष्ठ सम्मलित तीन सदस्यीय छनोट समिति गठन गर्नुभएको छ । यही समितिले आवेदन परेका मध्येबाट एक महिला (अनिवार्य) सहित तीन जनाको नाम सिफारिस गर्नेछ । छनोट समितिले गरेको सिफारिसको आधारमा युवा तथा खेलकुद मन्त्रीले मन्त्रीपरिषद् बैठकमा सदस्य सचिवको प्रस्ताव लगेर अनुमोदन गरिने ब्यवस्था छ ।
