परासी, फागुन ९ : सरकारले यही फागुन २३ गतेदेखि ६० वर्षमाथिका सबै नागरिकलाई कोरोनाविरुद्धको खोप लगाउने भएको छ । त्यसका लागि फागुन १६ गतेभित्र आ–आफ्नो स्थानीय तहका ज्येष्ठ नागरिकको तथ्यांक संकलन गरी पठाउन स्थानीय तहलाई आग्रह गरिएको स्वास्थ्य तथा जनसंख्या मन्त्री हृदयेश त्रिपाठीले जानकारी दिनुभयो ।
नवलपरासी (बर्दघाट सुस्ता पश्चिम)को बर्दघाट नगरपालिकास्थित पञ्चनगर स्वास्थ्य चौकीको आज भवन शिलान्यास गर्दै मन्त्री त्रिपाठीले फागुन २३ गतेदेखि खोप केन्द्रहरूमार्फत कोरोनाविरुद्धको खोप लगाइने जानकारी दिँदै ६० वर्षमाथिका सबैलाई खोप लगाउन आग्रह गर्नुभयो । उहाँले आजै १० लाख खोप डोज नेपाल भित्रिएको जानकारी पनि दिनुभयो ।
मन्त्री त्रिपाठीले कतिपय विकसित देशले समेत पैसा तिरेर पनि कोरोना खोप पाउन नसकिरहेको उल्लेख गर्दै आफूहरूको विशेष पहलबाट खोप प्राप्त गर्न सफल भएको बताउनुभयो । “कोरोना खोप अब स्वास्थ्य सामग्रीका रूपमा मात्र नभई राजनीतिक सामग्रीका रूपमा विश्वव्यापी भएको छ”, उहाँले भन्नुभयो ।
फरक प्रसंगमा मन्त्री त्रिपाठीले लुम्बिनी र गण्डकी प्रदेश जोड्ने गरी दाउन्ने खण्डको विकल्पमा संसारकोट–दुम्किबास सडक निर्माणका लागि केन्द्रीय योजनाका रूपमा सरकारले प्राथमिकता दिएको जानकारी दिनुभयो । सो सडकका लागि बजेट विनियोजन भई काम शुरुआत भइसकेको उहाँले जानकारी दिनुभयो ।
