काठमाडौं, माघ २५ : वेष्ट इन्डिजले एशियामा पाँचौं सबैभन्दा ठूलो लक्ष्यको सफलतापूर्बक पछ्याउँदै बङ्गलादेशलाई हराएको छ । कायल मेयर्सले आफ्नो डेब्यु खेलमै दोहोरा शतक लगाएर बङ्गलादेशमाथिको ऐतिहासिक जितसम्म डोर्याउनुभयो ।
बङ्गलादेशले प्रस्तुत गरेको ३९५ रनको लक्ष्य पछ्याउँदै वेष्टइन्डिजले दिनको खेल सकिन तीन ओभर बाँकी छँदा सात विकेटको क्षतिमा पुरा गर्यो । उसको जितमा कायल मेयर्सले अविजित रहँदै सर्वाधिक २१० रनको योगदान दिनुभयो ।
रुमा बोन्नरले ८६ रनको योगदान दिनुभयो । ५९ रनमै तीन विकेट गुमाएर कमजोर सुरुवात गरेको वेष्टइन्डिजका लागि कायल मेयर्सले बोन्नरसँग चौथो विकेटका लागि २१६ रनको साझेदारी गर्नुभयो । ३३ ओभरमा १२९ रन ल्याउन आवश्यक छँदा कायलले आफ्नो स्ट्राइक दरको गति बढाउँदै मात्र ३१० बलमा २० चौका र सात छक्काको सहयोगमा २१० रन जोड्नुभयो । बोन्नरले २४५ बल खेलेर ८६ रन बनाउनुभयो ।
कायम मेयर्स डेब्यु टेष्टमै दोहोरा शतक लगाउनुहुने छैठौं ब्याट्सम्यान हुनुभएको छ । उहाँ चौथो पारीमा दोहोरा शतक लगाउने छैठौं ब्याट्सम्यान समेत बन्नुभएको छ । बङ्गलादेशका लागि मेहेदी हसन मिराजले सर्वाधिक चार तथा तैजुल इस्लामले दुई र नईम हसनले एक विकेट लिनुभयो । त्यसअघि, चित्तगाउँमा टस जितेर पहिला ब्याटिंग गर्ने निर्णय गरेको बङ्गलादेशले पहिलो पारीमा ४३० रनको औसत योगफल तयार गरेको थियो । मेहेदी हसन मिराजले शतकीय पारी खेलेपछि बङ्गलादेश बलियो स्थितिमा पुगेको थियो ।
२४८ रनमा छ विकेट गुमाएको बङ्गलादेशका लागि शकीब अल हसनले मेहदी हसनसँग सातौं विकेटका लागि ६७ रनको साझेदारी गर्नुभयो । शकीब अल हसन ६८ रन बनाएर पेभेलियन फर्किदा मेहदी हसनले १०३ रनको उत्कृष्ट पारी खेल्नुभयो । ओपनर शदनम इस्लामले ५९ रनको पारी खेलेर बङ्गलादेशको पारीलाई स्थिरता दिने प्रयास गर्नुभयो । मध्यक्रममा मुश्फीक्र रहिमले ३८ तथा लिटन दासले ३८ रनको योगदान दिनुभयो ।
वेष्टइन्डिजका लागि जोमेल वरिकनले सर्वाधिक चार विकेट लिनुभयो । रखीम कोर्नवालले दुई तथा केमार रोच, शैनन गेब्रेल र क्रुमाह बोनरले सामान एक एक विकेट लिनुभयो । जवाबमा वेष्टइन्डिजको पहिलो पारी २५९ रनमा समेटियो । जर्माइन ब्ल्याकउडको ६८ तथा कप्तान क्रैग ब्रैथवेटको ७६ रन अतिरिक्त अन्य कुनै पनि ब्याट्सम्यानले प्रभाबकारी प्रदर्शन गर्न सक्नुभएन । वेष्टइन्डिजमाथि पहिलो पारीमा १७१ रनको अग्रता दिलाउन बङ्गलादेशका लागि मेहेदी हसन मिराजले सर्वाधिक चार विकेट लिनुभयो । मुस्तफीजुर रहमान, तैजुल इस्लाम र नइम हसनले सामान दुई दुई विकेट लिनुभयो ।
पहिलो पारीमा १७१ रनको अग्रता लिएको बङ्गलादेशले दोस्रो पारी आठ विकेटको क्षतिमा २२३ रनमा घोषणा गर्दै वेष्टइन्डिज समक्ष ३९५ रनको लक्ष्य प्रस्तुत गरेको थियो । बङ्गलादेशका लागि कप्तान मोमिनुल हकले दोस्रो पारीमा शतक लगाएपछि ऊ औसत योगफल तयार गर्न सफल भयो । विकेटकीपर लिटोन दासले ६९ रन बनाउँदा अन्य कुनै पनि ब्याट्सम्यानले उल्लेख्य प्रदर्शन गर्न सकेनन । वेष्टइन्डिजका लागि रखिम कर्नवाल र जोमेल वारिकनले सामान तीन तीन तथा शैनोन गेब्रैलले दुई विकेट लिनुभयो ।
