काठमाडौं, माघ २२ : लिभरपुल घरेलु मैदान एनफिल्डमा पुनः हार बेहोरेको छ । उसलाई ब्राइटनले १–० ले हराएको हो । बुधबार नै सम्पन्न अर्को खेलमा म्यान्चेष्टर सिटीले बर्नलीमाथि २–० को जित हात पार्यो ।
ब्राइटनका लागि दोस्रो हाफमा स्टिभन अल्जाटेले गर्नुभएको एक मात्र गोल नै लिभरपुलमाथि जितका लागि पर्याप्त भयो । ब्राइटनले सन् १९८२ पछि पहिलोपटक लिभरपुलमाथि घर बाहिर जित हात पारेको हो । अल्जाटेले ५६ औं मिनेटमा गोल गर्दै ब्राइटनलाई १–० को अग्रता दिलाउनुभयो ।
हारसँगै लिभरपुल चौथो स्थानमा पुगेको छ ।
शीर्ष स्थानको म्यान्चेष्टर सिटीभन्दा ऊ सात अङ्कले पछाडि परेको छ । आगामी आइतबार शीर्ष स्थानको म्यान्चेष्टर सिटी लिभरपुलसँग एनफिल्डमा भिड्ने तिथि नजिकिदै जाँदा ब्राइटनसँग हार बेहोरेर लिभरपुलले महत्वपूर्ण तीन अङ्क बटुल्ने अवसर खेर फाल्यो ।
