पथरीशनिश्चरे–मोरङ, पुस ९ : द रियल ब्रदर्स फुटबल क्लबले मोरङको पथरीशनिश्चरेमा जारी पथरीशनिश्चरे फुटबल प्रिमियर लिगको उपाधिको होडका लागि स्थान सुनिश्चित गरेको छ । टाइब्रेकरमा न्यु स्टार क्लबलाई ४–३ गोलअन्तरले हराउँदै उसले उपाधि होडको यात्रा सुनिश्चित गरेको हो ।
निर्धारित समय गोलरहित बराबरी खेलेको न्युस्टार र द रियल ब्रदर्सले थप गरिएको २० मिनेटमा पनि कुनै गोल गर्न सकेनन् । त्यसपछि अन्तिम निर्णय टाइबे्रकरबाट गरिएको हो । टाइब्रेकरमा न्युस्टारका कप्तान मीन धिमाल र विबेक लिम्बूले बल आउट हानेपछि द रियल ब्रदर्सको भाग्य चम्किएको हो ।
न्युस्टारका रेमेश लिम्बू,प्रविन आङ्दम्बे र समीर धिमालले गोल गर्नुभएको थियो । उता द रियल ब्रदर्सका देवराज गरूङको प्रहार न्यू स्टारका गोलरक्षक विशाल मगरले नियन्त्रणमा लिएपनि न्यू स्टारको हार टार्न सकेनन । द रियल ब्रदर्सका खेलाडी तीर्थराज बस्नेत,दीपेन माझी ,समीर याक्खा र बिशाल पाण्डेले गोल गर्नुभयो ।
कोरोना कहरका बेला भरिभराउ दर्शक पाएको आजको खेलमा न्यूस्टार क्लबका ६ जना खेलाडीले पहेंलो कार्ड पाए । अत्यन्तै संघर्षपूर्ण खेलमा द रियल ब्रदर्शले बारम्बार गोल गर्ने राम्रा अवसर पाएपनि न्यूस्टारका गोल रक्षक बिशाल मगरले दर्शनीय बचाउ गर्नुभयो ।
आजको खेलमा द रियल ब्रदर्स फुटबल क्लबका देवराज गुरुङ म्यान अफ द म्याच घोषित हुँदै पुरस्कृत हुनुभयो । प्रिमियर लिगको फाइनल खेल द रियल ब्रर्दस र नवोदय फुटबल क्लव बीच शनिवार हुनेछ । मोफसलको पहिलो प्रिमियर लिग फुटबल प्रतियोगिताका विजेताले एक लाख ७५ हजार रुपियाँसहित उपाधि र उप विजेताले ७५ हजार रुपियाँ सहित ट्रफि र प्रमाणपत्र पाउने छन् ।
