काठमाडौं, साउन ३२ : विकासको प्रकृयामा रहेको चिनियाँ खोपको दोस्रो चरणको परीक्षण पनि आशाजनक देखिएको छ । चिनियाँ सञ्चारमाध्यम सिन्हवाका अनुसार दोस्रो चरणको क्लिनिकल ट्रायलको ‘डाटा’ले खोप सुरक्षित र प्रभाबकारी देखिएको छ । खोपले प्रतिरोधी क्षमता विकास गरेको सिन्हवाले उल्लेख गरेको छ ।
उक्त खोपको दोस्रो चरणको क्लिनिकल ट्रायलको ‘डाटा’ अमेरिकी मेडिकल अशोसिएशनको जर्नलमा प्रकाशन गरिएको छ । शोधपत्रमा पहिलो र दोस्रो चरणमा गरिएको ‘ट्रायल’को अन्तरिम विश्लेषण गरिएको छ । उक्त खोपको चिनियाँ नेशनल बायोटेक ग्रुपको वुहान इन्स्टिच्युट अफ बायोलोजिकल प्रोडक्ट्स अन्तगर्त सिनोफार्मले विकास गर्दैछ ।
ट्रायलमा १८ देखि ५९ वर्ष उमेर समूहका ३२० जना स्वस्थ्य स्वयंसेवीलाई सहभागी गराइएको थियो । जसमध्ये ९६ जना पहिलो चरणको क्लिनिकल ट्रायलमा भाग लिए । बाँकीको २२४ जना दोस्रो चरणको ट्रायलमा भाग लिएको जनाइएको छ । कम, मध्यम र बढी गरी तीन मात्रामा खोप लगाइएको थियो । खोपको प्रयोगले प्रभावकारी रुपमा प्रतिजिवी तटस्थ बनाउन प्रेरित गरेको पाइयो । र प्रतिरोधी क्षमता राम्रो देखापर्यो ।
शोधपत्रमा खोपको प्रयोग कत्तिको सुरक्षित रहेको समेत मूल्याङ्कन गरिएको छ । खोपको प्रयोगले गम्भिर प्रकारको प्रतिकूल असर नगरेको प्रकाशित शोधलाई उद्धृत गर्दै सिन्हवाले उल्लेख गरेको छ । खोप लगाइएको शरीरको भागमा दर्द हुनुका साथै ज्वरो आउने र पछि स्वतः निको हुने देखिएको छ ।
