वीरगञ्ज, साउन १४ : बुधबार साँझ १७ जनामा काेराेना सङ्क्रमण पुष्टि भएकाे छ । वीरगञ्जस्थित नारायणी अस्पतालको प्रयोगशालामा गरिएको परीक्षणमा बुधबार साँझ थप १७ जनामा कोरोना सङ्क्रमण पुष्टि भएसँगै बुधबार एकैदिन पर्सामा ५१ जना सङ्क्रमित थपिएका हुन् ।
नारायणी अस्पतालका मेडिकल सुपरिन्डेन्टेन्ट मदन उपाध्यायका अनुसार बुधबार साँझ नारायणी अस्पतालका चार स्वास्थ्यकर्मीसहित १७ जना सङ्क्रमित फेला परेका र यसअघि बुधबार बिहान सेना, प्रहरी र कैदीबन्दीसहित ३४ जना कोरोना सङ्क्रमित फेला परेका थिए । यसरी बिहान र बेलुकी गरी बुधबार ५१ जनामा कोरोना सङ्क्रमण देखिएको हो ।
साँझ पुष्टि भएका सङ्क्रमितहरूमा नारायणी अस्पतालका एक जना चिकित्सक, दुई जना नर्स र एक जना अहेब गरी चार जना स्वास्थ्यकर्मी, वीरगञ्ज महानगरपालिका वडा नं. २५ का चार जना, वडा नं. १२ का तीन जना, वडा नं. ५ का दुई जना, वडा नं. ४ का एक जना, वडा नं. ३ का एक जना, पर्साकै छिपहरमाई गाँउपालिका-२, टिहुकीका एक जना र नारायणी अस्पतालकै सङ्क्रमित कर्मचारीकी एक जना छोरी रहेका छन् ।
बिहान पुष्टि भएका सङ्क्रमितहरूमा नेपाली सेनाका एक जना, नेपाल प्रहरीका तीन जना, वीरगञ्ज कारागारका कैदीबन्दी छ जना, वीरगञ्ज कारागारकै कर्मचारी दुई जना, स्वास्थ्यकर्मी एक जना र पैसा तिरेर पीसीआर परीक्षण गराएकामध्ये एक जनालगायत ३४ जना रहेका छन् । जसमा वीरगञ्ज वडा नं. १५ का आठ जना, वडा न ४ का ११ जना, वडा नं. ५ का तीन जना, वडा नं. २५ का तीन जना, वडा न ९ , ११ , १२ , ३२ का एक/एक१ जना, वडा न १० आदर्शनगरका दुई जना र हरैयाका एक जनालगायत ३४ जना सङ्क्रमित रहेका छन् ।
बुधबार साँझ १७ जना सङ्क्रमण पुष्टि भएसँगै पर्सा जिल्लाका हालसम्म सङ्क्रमितको सङ्ख्या ३२४ पुगेको जिल्ला स्वास्थ्य कार्यालय, पर्साका स्वास्थ्य निरीक्षक जयमोद ठाकुरले जानकारी दिनुभयाे ।
