काठमाडौँ, साउन १ : नेपाल कम्युनिष्ट पार्टी (नेकपा) को विवादित विषय सल्टाउन दुई अध्यक्ष केपी शर्मा ओली तथा पुष्पकमल दाहाल ‘प्रचण्ड’ सहित वरिष्ठ नेता माधवकुमार नेपालबीचको वार्ता सम्पन्न भएको छ ।
प्रधानमन्त्रीको सरकारी निवास बालुवाटारमा दिउँसो १२ बजेदेखि शुरुभएको त्रिपक्षीय वार्ता २ बजे सम्पन्न भएको प्रधानमन्त्रीका सञ्चार विज्ञ रामशरण बजगाईंले जानकारी दिनुभयो ।
यसअघिसम्म दुई अध्यक्षबीच एक्लाएक्लै वार्ता भएपनि बिहीबार पार्टीको आन्तरिक विवादको विषयलाई लिएर तीन नेताबीच वार्ता भएको हो । साउन २ गते (भोलि) शुक्रबार नेकपाको स्थायी कमिटी बैठक बस्दैछ ।
सो बैठकअघि दुई अध्यक्षबीच सहमति बनाउन नियमित बैठक बसिरहेको छ । आजको बैठक सकारात्मक भएपनि ठोस सहमति बन्न नसकेको अध्यक्षद्वयका सचिवालयले जनाएको छ ।
