वीरगञ्ज, असार १४ : बन्दाबन्दी खुकुलो गरिएसँगै सिर्सियास्थित सुक्खा बन्दरगाहबाट सामान नछुट्दा बन्दरगाहमा चाप बढेको छ । एक हजार ५४२ कन्टेनर राख्ने क्षमता रहेको वीरगञ्जस्थित सिर्सिया सुक्खा बन्दरगाहमा अझै क्षमताभन्दा दोब्बर कन्टेनर थन्किएका छन् ।
बन्दाबन्दीको समयमा कन्टेनर क्षमताभन्दा करिब चार गुणा बढी पुगेकोमा बन्दाबन्दी खुकुलो भएपछि आधा घटेका हुन् तर गन्तव्यसम्म पुग्न नपाई थन्किएका कन्टेनर अहिले पनि क्षमताभन्दा दोब्बर रहेका छन् ।
सुक्खा बन्दरगाह सञ्चालक कम्पनी हिमालय टर्मिनल प्रालिका व्यवस्थापक सदस्य अनिमेष कुमारका अनुसार एक हजार ५४२ टीयूई कन्टेनर राख्न सक्ने क्षमता रहेको बन्दरगाहमा तीन हजार ४३३ कन्टेनर थन्किएका छन् ।
उहाँले दैनिक दुई -याक अर्थात् करिब १८० कन्टेनर आइरहेका तर बन्दरगाहबाट जानुपर्ने सङ्ख्यामा कन्टेनर नगएकाले भन्सार क्षेत्रमा थन्किएको बताउनुभयो । सुक्खा बन्दरगाह भन्सारमा दुई हजार ३२० कन्टेनरभरि सामान रहेको र एक हजार ११३ खाली छन् ।
दैनिकजसो या कहिलेकाहीँ दुईदेखि तीन दिनको अन्तरमा दुई -याक कन्टेनर बोकेका रेल आइरहेका छन् तर बन्दाबन्दीका कारण पर्याप्त कन्टेनर अन्यत्र पठाउन नसकिएकाले कन्टेनर थन्किएको उहाँले बताउनुभयो ।
दैनिक २५० देखि तीन सय कन्टेनर सुक्खा बन्दरगाहबाट निस्कने गरेकोमा हालका दिनमा १८० देखि दुई सयवटा मात्र कन्टेनरबाट सामान लिएर जाने गरेका छन् । बन्दाबन्दीको समयमा १२० देखि १५० कन्टेनर मात्र जाने गरेका थिए ।
व्यवस्थापक सदस्य अनिमेष कुमारका अनुसार बन्दरगाहमा कन्टेनर थुप्र्रिएपछि बन्दाबन्दीका कारण चैत २८ गतेदेखि लाग्ने गरेको जरिवाना पार्किङलगायत शुल्क मिनाहा गरिरएको भए पनि जेठ ६ गतेदेखि भने फेरि लगाइएको छ ।
डिटेन्सन र पार्किङ शुल्क लाग्न थालेपछि व्यवसायीले धमाधम कन्टेनर लग्न थालेको वीरगञ्ज उद्योग वाणिज्य सङ्घका महासचिव माधव राजपालले बताउनुभयो । प्रतिटन प्रतिदिन ७७ रुपियाँदेखि १५४ रुपियाँका अतिरिक्त भ्याट रकमसहित डिटेन्सन चार्ज र प्रतिदिन प्रतिकन्टेनर १८२ रुपियाँदेखि ३६३ रुपियाँ पार्किङ चार्ज व्यवसायीले बुझाउनु परेको उहाँले बताउनुभयो ।
जरिवाना नलाग्ने सुविधा सामान्य अवस्था नभइन्जेल कायम राख्दा राम्रो हुने वीरगञ्ज उद्योग वाणिज्य सङ्घका अध्यक्ष गोपाल केडिया बताउनुहुन्छ । अहिलेको अवस्थामा व्यवसायी डिटेन्सन र पार्किङ शुल्कमा मात्रै दैनिक करोडौँ रुपियाँ जरिवाना बुझाउन बाध्य भएको उहाँको भनाइ छ ।
