अछाम, जेठ २८ : भारतबाट आएर क्वारेन्टाइनमै रहेकी एक महिलाले सोही स्थानमा एक छोरालाई जन्म दिएकी छन् । मंगलसेन नगरपालिका–१ कुन्तीकी २७ वर्षीया रुबिना थापाले क्वारेन्टाइनस्थलमै बालकलाई जन्म दिनुभयो ।
सोही वडाको कुन्ती माविमा रहेको क्वारेन्टाइनमा जेठ १४ बाट बसिरहेकी रुबिनाले अनमी कल्पना भण्डारी र जमुना खातीको सहयोगमा सुत्केरी भएको कुन्तीका स्वास्थ्य चौकी इन्चार्ज अर्जुन बोहराले जानकारी दिनुभयो । बोहराका अनुसार आमा र बालक दुबैको स्वास्थ्य अवस्था सामान्य रहेको छ । सुत्केरी रुबिनालाई सोही क्वारेन्टाइनमा रहेको अलग्गै कोठामा राखेर सुत्केरी गराइएको बताइएको छ ।
रुबिनासहित उक्त क्वारेन्टाइनमा रहेका नौ जनामा कोरोना सङ्क्रमणको जेठ १९ मा स्वाब सङ्कलन गरेर पीसीआर परीक्षणमा एक ५२ वर्षीया महिलामा कोरोना सङ्क्रमण देखिएको थियो । भारतबाट आएर उक्त क्वारेन्टाइनमा रहेका ३२ जनाको बुधबार नै आरडिटी परीक्षण गरेर नेगेटिभ आएपछि घर पठाइएको छ । यसअघि पीसीआर रिपोर्ट नेगेटिभ आएकालाई समेत घरमा एकान्तवास बस्ने गरी घर पठाइएको वडा अध्यक्ष गोपाल थापाले जानकारी दिनुभयो ।
अछाममा यसअघि क्वारेन्टाइनमै रहेका बेला मेल्लेख गाउपालिका र ढकारी गाउँपालिकाका दुई युवती सुत्केरी भएकी थिइन् । बन्दाबन्दीमा मात्र भारतबाट अछाममा १२ हजार पाँचसय व्यक्ति आएकोमा त्यसको १५ प्रतिशत महिला रहेको जिल्ला प्रशासन कार्यालय अछामको तथ्याङ्क रहेको छ ।
