विराटनगर, जेठ १६ : अर्थमन्त्री डा युवराज खतिवडाले आर्थिक वर्ष २०७७-७८ लागि प्रस्तुत गर्नुभएको बजेटप्रति विराटनगरका उद्योगीले खुशी व्यक्त गरे पनि उद्योग र उद्योगी क्षेत्रमा आशाजनक रहेको प्रतिक्रिया दिएका छन् ।
मोरङ व्यापार संघका अध्यक्ष प्रकाश मुन्दडाले बजेटले उद्योग र उद्योगीको आशालाई पूरा गर्न नसकेको बताउनुभयो । संघका पूर्वअध्यक्ष ताराचन्द खेतानले बजेट विकास र सुधारमा केन्द्रित देखिए पनि धराशायी हुन लागेको उद्योगप्रति मौन रहेको प्रतिक्रिया दिनुभयो । उहाँले पर्यटन क्षेत्रमा पुगेको नोक्सानमा राहत दिन नसकेकामा असन्तुष्टि व्यक्त गर्नुभयो ।
उद्योगी महेज जाजुले उद्योगसम्बन्धी पुष्टि नभएका मुद्दा फिर्ता लिएमा राम्रो हुने बताउँदै जरिवाना र दण्ड मिनाहा हुने कुराले खुशी बनाएको बताउनुभयो । उद्योगी एवं राजनीतिकर्मी पवन शारडाले बजेटले साना उद्योगी र व्यापारीलाई करमा छुट दिएकामा सकारात्मक रुपमा लिँदै धेरै वस्तुमा अन्तःशुल्क घटाउनाले बजेट राम्रो भएको प्रतिक्रिया दिनुभयो ।
