धनगढी, जेठ २ : बर्दियाको राजापुरकी कोरोना सङ्क्रमित ११ वर्षीया बालिकाको सम्पर्कमा आएका कैलालीका १०१ जना व्यक्तिको थ्रोट स्वाब परीक्षण रिपोर्ट नेगेटिभ आएको छ ।
गोदावरी नगरपालिका–८ मजगाउँका ९६ जना र भजनी नगरपालिका–१ का पाँच जनाको पीसीआर परीक्षण गर्दा स्वाब रिपोर्ट नेगेटिभ आएको हो । सङ्क्रमित बालिका मजगाउँमा झन्डै एक महिना बस्नु भएको थियो ।
बालिका बस्नु भएको परिवारकोसहित पहिलो प्राथमिकतामा परेका सबै व्यक्तिको रिपोर्ट नेगेटिभ आएको गोदावरी नगरपालिकाका उपप्रमुख रत्ना कडायतले बताउनुभयो । पछि सङ्कलन गरिएको ३८ व्यक्तिको स्वाब रिपोर्ट आउन भने बाँकी रहेको उहाँको भनाइ छ ।
मजगाउँपछि ती बालिका करिब एक हप्तासम्म भजनी गएर आफन्तको घरमा बस्नु भएको थियो । उहाँ बसेको परिवारका पाँचै जना सदस्यको रिपोर्ट निगेटिभ आएको भजनी नगरपालिकाका प्रमुख शेरबहादुर चौधरीले जानकारी दिनुभयो । ‘घुलमिल भएका थप २५ जनाको स्वाब पठाएका थियौं, त्यसको रिपोर्ट आउन बाँकी छ’, उहाँले भन्नुभयो । राजापुर नगरपालिकाकी ती बालिकालाई केहि दिन अगाडि कोभिड–१९ सङ्क्रमण रहेको पुष्टि भएको थियो ।
