अछाम, वैशाख १९ : कोरोना भाइरसको आशंकामा अछाम अस्पतालको आइसोलेशन कक्षमा उपचाररत रहेकी महिलामा कोरोना संक्रमण नभएको नतिजा आएको छ ।
वैशाख १५ बाट मंगलसेन नगरपालिका–५ की ५१ वर्षीया महिलालाई कोरोना संक्रमण नभएको रिपोर्ट आएको स्वास्थ्य कार्यालय अछामका प्रमुख झनकराज ढुंगानाले जानकारी दिनुभयो ।
आइसोलेशन कक्षमा रहेकी महिलाको बिहीबार विहान मृत्यु भए लगत्तै स्वाब संकलन गरेर पिसिआर परीक्षणका लागि सुर्खेतमा पठाइएको थियो । मृतकको आरडिटी परीक्षणमा नेगेटिभ रिपोर्ट आएको थियो ।
आइसोलेशन कक्षमा मृत्यु भएकी महिलाको उपचारमा संलग्न भएका डाक्टरसहितका १३ जना स्वास्थ्यकर्मी आइसोलेशनमा बसेका थिए ।
मृतकलाई ज्वरो आउने, खोकी लाग्ने भइपछि चारदिन अघि जिल्ला अस्पतालको आइसोलेशन कक्षमा भर्ना गरेर उपचार भइरहेको थियो ।
मृतकको बिहीबार नै परम्परागत रुपमा दाहसंस्कार सम्पन्न भएको छ ।
