कास्की, २ फागुन : नेपालका प्रेरणा कोइराला र अभिलाषा विष्ट पोखरामा जारी अन्तर्राष्ट्रिय टेनिस फेडेरेशन(आइटिएफ)को जुनियर यु–१८ टेनिस प्रतियोगिताको सेमि फाइनलमा प्रवेश गर्नुभएको छ ।
जिल्ला टेनिस सङ्घको आयोजना तथा अन्तर्राष्ट्रिय टेनिस महासङ्घको समन्वयमा माघ २७ गतेदेखि पोखरा रङ्गशालास्थित टेनिस कोर्टमा सञ्चालन भइरहेको प्रतियोगिताको बिहीबार भएको महिला एकलतर्फको प्रतिस्पर्धामा कोइरालाले नेपालकै सलोनी तामाङलाई ७–५ र ६–४ को सेटमा जीत निकाल्दै सेमिफाइनल प्रवेश गर्नुभएको हो ।
त्यसैगरी जापानका अओका नागासावालाई ६–१ र ६–४ को सोझो सेटमा पराजित गर्दै विष्टले अन्तिम चारको यात्रा तय गर्नुभयो । भारतीय खेलाडी गर्गी परवरले चिनियाँ खेलाडी सुहाङ लियाङलाई ६–२ र ६–२ को सेटमा पराजित गर्दै सेमि फाइनलमा स्थान सुरक्षित गर्नुभयो । सिङ्गापुरका डिने चोले चीनका हुवाई चाङलाई ७–५ र ६–२ को सेटमा पराजित गर्नुभएको थियो । पुरुष एकलतर्फको प्रतिस्पर्धामा भारतका जस्मिनी सिधानाले भारतकै टोरस रावतलाई ६–२ र ६–१ को सेटमा पराजित गरी जीत हासिल गर्नुभयो भने भारतका कृष्ण होडाले जापानका साटोनाकाजिमा माथि जीत हासिल गर्नुभयो ।
जापानका शोगो साण्डाले भारतीय खेलाडी आर्यन लक्ष्मणलाई ६–७(४), ६–०, ६–४ को सेटले पराजित गर्नुभयो । भारतका अमन दहियाले जर्मनका पउल अर्मिन एलब्रक्टमाथि ६–३ को समान सेटमा जीत हासिल गर्नुभयो । महिला डवल्सतर्फ भारतका गर्गी परवर र हृदय शाको जोडीले मलेसियन हुई इलसो र नेपाली खेलाडी सलोनी तामाङको जोडीलाई ६–४ र ६–३ को पराजित गर्न सफल हुनुभयो ।
हङकङका इरिका कान्न हगी र भारतका रिया उबोभेजाको जोडीले नेपाली खेलाडी अभिलाषा विष्ट र इरा मेहेरनिसा रावतको जोडीलाई ६–३, ६–२ को सेटमा पराजित गर्नुभएको प्रतियोगिता संयोजक सूर्य भुजेलले जानकारी दिनुभयो । पुरुष डवल्सतर्फ भारतका अदिय बरदान रोय चौधरी र जैस्मिन सिधानाको जोडी र भारतकै अमन दहिया र हीरक भोराको जोडीबीच फाइनलमा प्रतिष्पर्धा हुने बताइन्छ ।
प्रदेशस्तरीय भलिबल आयोजना हुँदै
कास्कीको रुपा गाउँपालिकाले स्थानीय तह स्थापना दिवसको अवसर पारेर गण्डकी प्रदेशअन्तर्गतका स्थानीय तहबीच ‘अध्यक्ष कप भलिबल’ प्रतियोगिता गर्ने भएको छ । यही फागुन २४ देखि २७ सम्म गाउँपालिकाले दोस्रो संस्करणको भलिबल प्रतियोगितासहित विभिन्न कार्यक्रम आयोजना गर्न लागेको बिहीबार पत्रकार सम्मेलन गरेर जानकारी दिएको छ ।
भलिबल प्रतियोगितामा गण्डकी प्रदेशअन्तर्गतका ८५ वटै स्थानीय तहलाई सहभागिताका लागि पत्राचार गरिएको गाउँपालिका अध्यक्ष नवराज ओझाले जानकारी दिनुभयो । युवालाई खेलकूदको माध्यमबाट उनीहरुको शारीरिक, मानसिक, संवेगात्मक र व्यक्तित्व विकास गर्ने उद्देश्यले प्रतियोगिता गर्न लागिएको उहाँले बताउनुभयो । भलिबल प्रतियोगिताको विजेताले एक लाख २० हजारसहित ट्रफी तथा प्रमाणपत्र प्राप्त गर्नेछन् । द्धितीयले ९० हजार, तृतीयले ६० हजार तथा सान्त्वनालाई ३० हजार पुरस्कार प्रदान गरिने छ ।
प्रतियोगिताको उत्कृष्ट स्पाइकर, सर्भर, ब्लकर, सेटर, लिब्रोलाई जनही तीन हजारका दरले पुरस्कार प्रदान गरिने छ भने उत्कृष्ट खेलाडीलाई पाँच हजार पुरस्कार प्रदान गरिने बताइन्छ । त्यसैगरी गाउँपालिकाभित्र लोप हुन लागेको विभिन्न जाति तथा समुदायको संस्कृति तथा परम्परालाई जर्गेना र संरक्षण गर्ने उद्देश्यले पालिकास्तरीय झाँकी प्रदर्शनीसमेत आयोजना गरिएको छ । जसमा प्रथम, द्धितीय र तृतीय हुनेलाई क्रमशः ४० हजार, ३० हजार र २० हजार पुरस्कार प्रदान गरिने बताइन्छ ।
त्यसैगरी पालिकाभित्रको मौलिककला र संस्कृतिलाई प्रोत्साहन गर्ने उद्देश्यले ‘रुपा डान्स आइडल २०७६’ को आयोजना गर्ने भएको छ । बिहीबारदेखि गाउँपालिकाको थुम्की, भिरचोक र देउरालीमा आइडलको अडिसन चरणबाट फाइनलका लागि प्रतिस्पर्धी छनोट गरेर फागुन २७ गते फाइनल आयोजना गरिने तय गरिएको छ ।
डान्स आइडलको विजेता ३० हजार तथा ट्रफी प्राप्त गर्नेछन् भने द्धितीय, तृतीय तथा उत्कृष्टले क्रमशः २०, १० र पाँच हजार पुरस्कार प्रदान गरिने प्रमुख प्रशासकीय अधिृकत विष्णुप्रसाद पोखरेलले जानकारी दिनुभयो । अध्यक्ष ओझाले ‘रुपाको पहिचान, सबै क्षेत्रमा समृद्धिको अभियान’ का नाराका साथ पर्यटन विकास, खानेपानी, शिक्षा, स्वास्थ्य, भौतिक पूर्वाधार, सडक, सिँचाइ, कृषि, पशुपालन र रोजगारी विकासलाई प्राथमिकता दिएर काम अघि बढाइएको जानकारी दिनुभयो ।
